Los años noventa del sieglu pasáu trayíen, a cada poco, noticies esperanzadores pa la llingua asturiana. Creábense editoriales nueves y cases discográfiques, abríen llibreríes, empezó a publicase aquel selmanariu que se llamó Les Noticies, les novedaes editoriales recibíense con atención y con emoción, les manifestaciones en favor de la llingua yeren multitudinaries y dalgunos partíos políticos competíen ente ellos por representar n'esclusiva l'asturianismu; una llei desarrollaba pa les siguientes décades l'artículu cuartu del Estatutu d'Autonomía d'Asturies, el que se refier al asturianu... Tamién se creaben premios lliterarios, dalgunos agora consolidaos (Teodoro Cuesta, Fernán-Coronas, Xuan María Acebal...), otros desaparecíos (Vital Aza, Elvira Castañón...). Ente toos ellos rescamplaba y sigue brillando un premiu qu'ameritaba mayor difusión y conocencia, que continúa convocándose güei, al cabu de más de venti años: el Fernández Lema de relatu curtiu.
En 1994 creábase en L.luarca la Fundación Fernández Lema a partir de la dotación económica de la lluarquesa Dolores Fernández Lema, una muyer del sieglu XX que pasó la mayor parte de la vida alloñada d'Asturies, amante de la cultura y les bones artes, viaxera obstinada, amiga d'ilustres españoles como Ramón J. Sender, Álvaro de Albornoz o Severo Ochoa. L'ayuntamientu de Valdés acoyó la Fundación na Casa de Cultura, contribuyendo notablemente nestos años al mantenimientu de les sos actividaes, principalmente dos: un premiu de carácter anual a los escolares de mayor méritu del conceyu, y la convocatoria d'un premiu lliterariu d'ámbitu internacional que, dende la primer convocatoria (1995), se decidió que fuera de relatu curtiu. El xuráu d'esi añu alcontróse con dos relatos finalistes, un en castellanu y otru n'asturianu, ensin que les bases precisaran nada sobre la llingua del premiu. Consultáu'l patronatu de la Fundación, decidió partise'l premiu ente les finalistes, dos muyeres: Elisa Fenol y Berta Piñán. A partir de la segunda convocatoria, y hasta güei, estableciéronse dos modalidaes, una pa orixinales n'español y otra p'asturianu. La española tien agora una dotación económica de cinco mil euros de premiu, anque llegó a convocar siete mil. L'asturiana convoca dos mil quinientos, anque llegó hasta los tres mil quinientos euros.
Dende 1997 la Fundación recueye nun volume los cuentos ganadores de les dos convocatories, polo regular cada tres años y, asina, acaba de salir el correspondiente a los años 2012, 13 y 14. 2012 permitió xuntar en L.luarca a Juan Ignacio Ripoll (por ciertu, home de teatru, fíu de la popular actriz Concha Cuetos) con Quique Faes, ganadores de les modalidaes de castellanu y asturianu respectivamente. José Manuel Moreno (con un llargu currículu de premios detrás) y Xosé Nel Riesgo fuéronlo en 2013, y el poeta y novelista Juan Manuel Muñoz y Marisa López Diz, respectivamente, de la del 2014. La xeografía de la llingua española ta llarada de premios de relatu curtiu, anque mui pocos con un premiu tan sustanciosu; ello permite dir sumando nomes de prestixu ente los ganadores: Federico Villalobos, Ángel Zapata, Pablo Rodríguez Medina... Pal asturianu, pel so llau, ye l'únicu premiu de narrativa que concede una institución privada, y tien una dotación económica similar a la del Xosefa Xovellanos del Principáu, a pesar de qu'esti premiu ye pa novela frente al relatu curtiu del Fernández Lema
