La Nueva España

La Nueva España

Contenido exclusivo para suscriptores digitales

Con llingua propia

Pa L'Habana

El paraísu ye un engañu, según el teatru de Xurde Fernández

Xurde Fernández (Candás, 1975) estrénase como dramaturgu con Pa L'Habana (Premiu de Teatru de l'Academia de la Llingua Asturiana en 2013), publicáu de recién. Ye natural qu'un autor que tien desde hai dellos años presencia permanente y mui activa na cultura y lliteratura asturianes quiera averase tamién al teatru, el xéneru qu'a priori puea resultar más afayadizu pa qu'un creador se comunique col públicu.

Tres d'esti títulu pensé que diba topar les peripecies d'un emigrante a la gueta d'una vida nueva y un futuru meyor y dalgo d'eso ye lo qu'hai equí, anque nesta ocasión L'Habana seya esclusivamente'l paraísu col que s'engaña a los dos infelices protagonistes d'esta historia, colocaos dientro d'un formatu clásicu de tres actos dividíos en delles escenes caún. L'argumentu tamién ye vieyu: el poderosu abusando del débil; pero les circunstancies, l'ambiente y los personaxes son contemporáneos: dineru negro, empresarios, banqueros y guardies corruptos énte un par d'exdrogadictos desamparaos.

Les lletres A, C, G, J y X sustituyen a los nomes de dalgunos de los personaxes nesta obra protagonizada por dos mozos de vida marxinal: Y ya Z, escoyíos pa vixilar a un home que ta secuestráu nel suétanu probe y escuru d'una cabaña, l'escenariu de los dos primeros actos. Mientres cumplen col encargu, sueñen cola recompensa que-yos prometieron y que ye un viaxe a L'Habana, la ciudá que conocen per fotos de revistes, per internet y gracies a dalgún recuerdu llonxanu d'un bisgüelu qu'emigró. Uno d'ellos ye más optimista y l'otru siempre ta más gachu y anque de manera intermitente apaeza en dambos la ilusión, nel fondu tamién saben que la suerte yá los abandonó va tiempu. Paradóxicamente son ellos dos, de los que la sociedá nun espera nada honrao, los qu'amuesen la bondá, el respetu, la educación y los remordimientos éticos. Cuando la situación que los ocupa se resuelve, asumen el fracasu con dignidá y vuelven pa los bancos del parque onde vivíen, -tristemente llamáu "de la Llibertá"- y desde los que ven pasar, apriesa, les vides de la xente normal. Esi va ser l'escenariu del tercer actu. "Siempre nos engañen y siguirán engañándonos. Polo menos el nuestru parque y los nuestros bancos taben esperándonos onde siempre".

Xurde Fernández ofrez un testu de diálogos directos, fáciles, de llinguaxe natural y con un discursu ente llúcidu y absurdu, con momentos d'abandonu d'una esposición racional y hasta con dalgún rispiu d'humor. Un cenciellu drama de realismu social cotidianu, con personaxes que sufren, lloren y tán angustiaos en dellos momentos, pero col dramatismu rebaxáu darréu porque tán alienaos y yá se rindieron; yá nun s'enfurecen contra les inxusticies, sinón que les acepten con resignación. L'autor consigue caltener la tensión y l'interés nel llector polo que va pasar -tovía meyor tien que facelo nun espectador- hasta'l final del segundu actu, onde se produz el primer desenllaz. El tercer actu ye un nuevu puntu de partida col que vuelve a medrar la espectación hasta chocar cola realidá final.

Pa L'Habana tamién ye un testu preparáu con procuru pa la representación pol director que dispón dos altures nel escenariu, prepara movimientos de los personaxes pel pasiellu central del patiu de butaques o comunica los pensamientos de los secuestraos gracies a les imáxenes que se van proyectar nuna pantalla, amás de controlar los efectos de la escasa presencia de la lluz sobre unes tables y un asuntu solombrizos. Pero Y ya Z conocen un sitiu prestosu pal qu'escapar si les coses salen mal: "-¿Cómo sedrá L'Habana? /-Un llugar con muncha playa, munchu calor y muncha agua alredor".

Compartir el artículo

stats