La caza en Cultures

Entrega l'Academia de la Llingua Asturiana'l númberu venti de la so revista Cultures y dedícalu de manera cuasi monográfica a la caza, una xera cultural consustancial al ser humanu: dicía Cela que "l'home nació cazando, pintando y falando en versu y ye posible que muerra cazando, pero a lo meyor sin pintar nin rimar". L'asuntu ye vieyu, pero ta mui d'actualidá nestos tiempos, precisamente polos problemes surdíos desque esta dexó de ser una actividá primaria pa la economía campesina y ganadera.

Los artículos que conformen la mayor parte de la publicación son percorríos asemeyaos peles cultures de la caza en dalgunes zones de los conceyos de Llaviana (Vicente Rodríguez Hevia); Siero (Juan José Domínguez y Nacho Fonseca); Xixón (Llorián García-Flórez y Xosé María García Sánchez); Proaza (Antonio Alonso de la Torre y Francisca Iglesias); Morcín (Matilde Fernández Álvarez) y la Montaña Noroccidental de Lleón nes dómines medieval y moderna (Roberto González-Quevedo; Pablo García Cañón). Escritos por autores mui conocedores d'estos llugares y sofitaos con testimonios d'informantes espertos, tán espuestos de manera amena y minuciosa y describen la normalidá de la rellación del home col mediu qu'habitaba exerciendo una actividá que supunxo una defensa, un trabayu o un disfrute, pero qu'arraigonó fondamente na sociedá, sobre manera ente los homes, quien yá de nenos, armaos con gomeros o esguilando pelos árboles, s'aniciaben nel oficiu. Toos faen un repasu a los animales que se buscaben, les trampes, les armes, la estratexa y la finalidá de lo conseguío: comida -inclusive s'axunten dalgunes recetes-, pieles pa la venta y alimañes felizmente eliminaes pa defender a los animales domésticos. Amás del repasu a la bioloxía y la zooloxía, los artículos son una bona recoyida de toponimia menor, munches veces relacionada tamién colos animales que más se topaben neses zones, un recuerdu a l'arquitectura del paisaxe fecha adré pa la caza -como senderos artificiales y pozos-, o una esplicación a rares supersticiones que se caltienen güei. Lóxicamente, los testos tamién diferencien ente cómo se cazó nos últimos sieglos y en cómo evolucionó l'actividá desde mediaos del sieglo XX hasta'l panorama d'anguaño.

Na caza mayor, dos yeren los animales que-y daben el máximu prestixu al cazador: el gallu o faisán y sobre manera l'osu. De la presencia del osu na nuesa historia y lliteratura ocúpense los dos artículos d'Alberto Álvarez Peña, que tamién s'acompañen de prestoses ilustraciones d'escenes de caza, armes y presugos. Historia, tradición y lleenda xúntense al falar d'homes cuasi míticos, como Garrido o Xuanón de Cabanaquinta, que-yos dieron muerte a varies decenes d'osos caún; son bien prestosos de lleer los testimonios qu'al traviés de la oralidá fueron quedando de les sos fazañes. Osos, llobos y raposes dexaron la xaceda na lliteratura popular, en refranes, romances y cuentos. Ente lliterariu y ensayísticu ye l'artículu firmáu por Emilio Gancedo, que nos enseña'l máxicu mundu cotidianu de los ecoloxistes que más saben y que más faen pol mediu nel que viven, amás de presentanos al "cazaorín" de Casu.

Les consecuencies que traxo la caza sobre la fauna tamién s'analicen nel artículu de Javier Naves Cienfuegos y Alberto Fernández Gil, qu'espliquen el desaniciu de dalgunes especies, apurren estadístiques actuales y esponen la necesidá de soluciones p'afitar la conservación correuta de la biodiversidá.

De la pesca en dalgunos pueblos de la ribera de L'Órbigu ocúpase Francisco Xavier Pozuelu Allegre, nun completísimu tratáu de les mañes de los pescadores en ríos y regatos y alcordances de truches de más de seis kilos. Completa'l volume'l trabayu de Xuan F. Bas Costales sobre estructura familiar nuna casa de Samartín d'Ozcos.

Suscríbete para seguir leyendo