Harold Bloom, apasionáu siempre, acertáu a veces nos xuicios críticos, falando d' Elizabeth Barrett Browning echa contra lo que llama "les formes de resentimientu irreductibles". Eses formes son, esplica, les consideraciones de xéneru, raza, etnicidá, orientación sexual o clase social que sustituyen a los "tradicionales" (esta palabra ye mía) criterios estéticos y cognitivos a la de formar el canon. En términos xenerales nun ye verdá, porque el canon de la lliteratura occidental sigue siendo mayoritariamente blancu y masculinu (y pa un anglosaxón, amás, ta n'inglés); pero eses consideraciones de xéneru, raza o d'orientación sexual permitieron volver la vista atrás y rescatar obres olvidaes, actualizaes gracies a una nueva manera de mirar. Bloom, dirixista, ta avezáu a conformar un canon unitariu, "el canon", y nun se da cuenta de que nestos tiempos cadún busca los sos propios modelos y constrúi los modelos a midida. La crítica feminista busca la so propia xenealoxía y recupera nomes y obres que toos aprovechamos.
Lo mesmo ocurre coles narraciones de la esclavitú, un xéneru que tuvo mui de moda nel sieglu XIX por razones extralliteraries (los abolicionistes fomentaben la publicación de relatos de les peripecies esclavistes como mera propaganda). La crítica afroamericana ( Davis y Gates los primeros) volvió hai décades sobre aquellos llibros alcontrando en munchos d'ellos méritos lliterarios tan importantes o más que'l valor testimonial que tanto s'apreciaba nel so tiempu, cuando llegaron a ser, en munchos casos, verdaderos éxitos de venta. Ye'l casu del llibru que nos ocupa traducíu agora al asturianu, Esclavu doce años, escritu por Solomon Northup en 1853, en plenu éxitu de la novela d'esclavitú más conocida, La cabaña del tíu Tom, de Harriet Beecher Stowe (1811-1896), a la que Northup dedica la so obra. Les dos se publiquen enantes de qu'españe la guerra de Secesión americana, que terminaría cola victoria del norte sobre'l sur y l'abolición de la esclavitú. Northup naciera nel estáu de Nueva York en 1808, fíu d'un esclavu emancipáu. Agricultor, ganó fama de músicu itinerante tocando'l violín. Cuando acudió en 1841 a una posible ufierta de trabayu como músicu, secuestráronlu y, vía Washington, terminó nuna plantación de Luisiana; cambiáron-y el nome (o lo que ye lo mesmo, la identidá) pasando a llamase Platt.
Cuando llevaba más d'una década d'esclavu, ensin posibilidá d'escapar (anque lo intenta delles veces) y ensin resignase a la so situación, la suerte féxolu topar con un carpinteru canadiense, Bass, al que fai relatu de la so historia. Va ser esi estranxeru, poniendo en peligru la so propia integridá (nel sur, d'enterase, condenaríenlu por traidor), quien consiga comunicar a los amigos y familiares del secuestráu que ta vivu y esclavizáu, echando a andar un procesu secretu, clandestín, que va terminar cola so lliberación. Solomon Northup foi lliberáu el 4 de xineru de 1853, pasando a convertise nun activu abolicionista enantes de desparecer misteriosamente, quién sabe si porque lu asesinaron o porque volvieran a esclavizalu, como quier la lleenda popular. Hai unos años (2013) una película dirixida por Steve McQueen (estrenada n'España col títulu 12 años de esclavitud) volvía a poner d'actualidá esta novela, un bon exemplu d'esi xéneru que tantu influyó na narrativa d'escritores como Toni Morrison o na autobiografía de Malcom X.
