L'Academia de la Llingua Asturiana asoleya'l númberu trenta y tres de la so publicación lliteraria anual dirixida por Xosé Bolado y como yá vien siendo vezu, fai coincidir esti númberu de mayu col Día de les Lletres Asturianes. Nel añu en que dende les instituciones asturianes se quixo homenaxear a la lliteratura femenina, la presente ye una edición monográfica formada dafechu por testos escritos por muyeres. Venticinco escritores actuales llenen estes páxines con narrativa y poesía, a lo que s'añaden les guapes semeyes de la coleición "Texíos" de José Javier González.
Dientro de la estaya narrativa hai catorce collaboraciones, n'asturianu y gallego-asturianu, que van dende'l microrrelatu al cuentu y al relatu curtiu; una guapa entrada de diariu de viaxe -nada menos qu'a Ítaca- d' Esther Prieto y una traducción del cuentu "El fin" de Borges fecha por Claudia Elena Menéndez Fernández. Cuasi toles que s'inluyen son autores mui consolidaes nel panorama lliterariu asturianu, siempre presentes con buenes y interesantes histories construyíes con intención puramente lliteraria o como resultáu d'amañar dalguna reflexón personal emotiva. Tamién tienen so sitiu les autores que llegaron nos últimos años y que vienen p'arriquecer el conxuntu. En temática, coinciden varies d'elles en trayer del pasáu la señaldá d'un mundu y d'una forma de vida inda mui cercanes, pero que yá nun esisten y qu'elles vieron desapaecer: Pilar Arnaldo y la vida probe y heroica d'una familia campesina; Esther García López y les nueches de cuentos y mitos; les alcordances de les vides nos pueblos que firmen Aurora García Rivas y Marisa López Diz; la combinación que Consuelo Vega fai con habilidá ente la vida del pasáu y la del presente; la convulsión de sentimientos que sufre la emigrante asturiana en Nueva York que ye Paquita Suárez Coalla. Berta Piñán ofrez tres cuentos breves de personaxes corrientes a los que consigue, como siempre, facer especiales. Situaciones cotidianes nel restu: el testu de tienra reflexón d' Iris Díaz Trancho; la emotiva promesa d'E lisabet Felgueroso; les chocantes situaciones que nos proponen Carmen Gómez Ojea y María Xesús Llope y la pena disimulada qu'urde Laura Marcos.
Trece poetes apurren un total de cuarenta y un poemes n'asturianu, gallego-asturianu y la variante occidental de la llingua: Lourdes Álvarez, Ángeles Carbajal, Raquel F. Menéndez, Sabela Fernández, Yolanda Fidalgo, María José Fraga, Esther García López, I rma González-Quevedo Pedrayes, Vanessa Gutiérrez, Marisa López Diz, Marta Mori, Susana Sela y Ana Vega. Anque los estilos son mui diferentes, y al igual que pasa nos testos narrativos, hai poesíes que miren pa episodios y xente del pasáu y otres qu'apurren problemes del presente, personales y universales, consiguiendo un bayurosu conxuntu de les moliciones que nos van conformando como persones.
Dalgunos de los testos ofrecíos son inéditos y otros ofrécense como adelantu de llibros que tán acabante publicase o que van facelo próximamente: como'l relatu "Vuelta al cole" en Cuentos de ser y de tar (Trabe, 2017) de Laura Marcos; les poesíes de R aquel F. Menéndez en El llibru póstumu de Sherezade (Impronta, 2017) o les de Marisa López Diz en Les races del olvidu, onde los conmovedores versos de "Guah.es del oficiu" recuérdennos los abismos del mundu qu'habitamos.
Una vez más, esta revista ye una ocasión mui prestosa p'averase con comodidá a la lliteratura n'asturianu, lo mesmo pa un llector ayenu que pa los habituales, que van alcontrar nestos testos la esbilla actual y de bona calidá a la que la publicación yá nos tien avezaos.
