El nuevu capítulu lliterariu de Ramón Lluís Bande (Xixón, 1972) ye'l cuadernu de notes editáu nesti ensayu onde la cámara de la so mente va recoyendo con procuru les partes de tolo que ye'l procesu de creación artística, dende la inspiración inicial hasta'l posible resultáu final, revelando los nomes de los que-y fixeron camín teóricu y enumerando'l desfile de persones, paisaxes y momentos que llamaron la so atención.
De vocación cineasta, captador de la realidá y contador d'histories, ye llarga y de reconocida calidá la so trayectoria en prensa, cine y televisión, amás de na lliteratura. Tien claro lo que-y prestaría facer: ser quien a emitir, a la par, lo sublime y lo corriente, emocionando al públicu, faciendo que la comunicación -y l'arte- funcionen: "Gustaría-y consiguir qu'una enumberación caótica d'imaxes, vistes y posaes con precuru na memoria, consiguiere tresmitir una caricia d'emoción nel espectador". Y una obsesión asoma insistente a la hora d'acometer el trabayu: el convencimientu de que solo va poder acertar nel procesu comunicativu si fai concesiones personales, sacrificando la propia historia en favor de la historia de los demás: "Nun utilizar estos espacios pa cuntar la mio historia, cuntar la suya".
Estos esperimentos que traten d'atopar y definir l'arte, complétens e con cites, argumentos d'autoridá y prestoses anécdotes de dalgunos autores, almiraos por él, referentes en diferentes disciplines como puen ser Cézanne, Chéjov, Borís Pasternak, Peter Handke, Tonino Guerra, Antón García o Pablo Antón Marín Estrada.
Dos estayes apaecen nesti guion en tercera persona y na panorámica d'esta cámara: el mundu domésticu del cineasta, mientres crea constantemente: cuando carez d'insomniu, cuando viaxa, cuando fuma, cuando dulda, cuando tien una intuición, cuando acumula llibros; cuando'l so pensamientu se va aproximando a lo que quier facer, cuando acierta alcontrando una bona historia y siente una emoción tan satisfactoria; cuando disfruta cola afayadiza compañía d'una reflexón asemeyada a la suya, poque ye inseguru y tamién tien mieu. Y porque siempre ta sollerte a la redolada, la segunda estaya ye inevitable: el mundu xeográficu del asturianu y del home, poniendo cuidáu n'espresalo de la manera más oxetiva posible, nun quitándo-y la esencia: el so país, el paisaxe de costa o d'interior, de pueblos o ciudaes, tien presencia permanente: un camín, una carretera, una cocina, les foles, la nieve, el monte, los árboles, la seronda, la lluz de les tardes, un horru, una xata, les mazanes, los cantares d'una muyer o les fotos de guerrilleros feches por Constantino Suárez. Quixo que fuera'l so oficiu ser recuperador de la tradición, pero también restaurador de la historia y de la memoria: failo cuando enfoca pa los protagonistes del nuesu pasáu tráxicu de la guerra y la posguerra, colos testimonios de los fugaos que sobrevivieron y el recuerdu emotivu de los asesinaos.
La escritura, sacada d'una imaxe o pensada pa ser imaxe, ye especializada, técnica, descriptiva, mui trabayada, y alcanza tamién la poesía en numberoses ocasiones: "Ye una tarde que yá se rinde ensin condiciones énte la llegada de la nueche"; "Esta tarde de seronda confundida"; "El sol quema la realidá tranquila de la tarde nel pueblu"; "Cuando la nieve d'antroxu teñía de blanco puro'l paisaxe del alma".
La cámara de Bande graba y documenta dende va tiempu cómo foi y cómo ye Asturies: "quiciabes podamos distinguir la parte inferior d'unos horros, una colección de pegollos que va tiempu yá nun llevanten el mundu?", una responsabilidá cola que l'artista ta cumpliendo con respetu devotu y escrupulosu, constatáu equí nestos documentos nos qu'ofrez, tamién, la intrahistoria del so trabayu.
