Resultó mui bien qu' Elvira Laruelo (Les Arriondes, 1970) reconociera la deuda y s'ofreciera a saldala con poesíes; foi un aciertu qu'escoyera dir colocándoles pente les partes d'un árbol. Yá podíen les palabres valir de cura y de perdón, tamién a los árboles, polos daños que-yos causamos últimamente. Escritora dende fai años, nes casi ochenta composiciones de Pago en versos (Saltadera, 2017) l'autora parraguesa ofrez tola so producción poética n'asturianu, acuriosada con tiempu y repartida con meimu.
El corpus empieza poles esplicaciones qu'escarben hasta dar colos raigaños. Esta primera parte ye la presentación de les persones que la fixeron como ye y l'homenaxe que-yos dedica: güelos y pas, con personalidaes que condicionaron la suya propia: "Rozo cola piel la memoria de los que nun tán / pero pue que m'acaricien ellos tamién a mi / colos sos deos de fumu"; oxetos familiares y momentos de la infancia, concebida como'l paraísu de la eternidá inconsciente, conformen un álbum de guapes imáxenes escrites con señardá y munchu amor. Perbaxo asoma'l pasu del tiempu, implacable, que se fai realidá nella mesma, nes señes que va teniendo o qu'heredó de los antepasaos: bien se ven los años na arruga llarga y fonda de la frente, nes venes hinchaes de les sos manes, igual que les de la güela: "La mio sangre yá llate agora / tamién / a flor de piel".
El troncu ye la escritora nel momentu actual, los sos xestos diarios, los vezos, les contradicciones y pencima d'ello, la necesidá vital d'escribir, reclamando'l poder contador y salvador de la palabra, como lo sintiera Blas de Otero. La sensibilidá estrema de muyer y l'idealismu valiente trescalen pa estos versos d'intimismu cotidianu qu'a veces recuerden a Berta Piñán: "Nalgún momentu del día / perdí la llave, / la paciencia / el rímel / y la sorrisa" y a la cenciellez de Nené Losada: "Fici un corte seriu / na yema del deu corazón. / Escribir convirtióse nun sufrimientu, / cuéstame muncho teclear / la ele y la o. / Duelen golpe y cuchiellu, /árbol, colcha, / llechu? / olvidu". Como na corteza d'un árbol, l'alma siempre queda mancada polos engaños, auténticos ritos de pasu que nos cambien pa siempre. Pero tamién fai sitiu pal amor y el romanticismu, tan necesarios pa siguir: "Llegasti ensin pasaporte a la frontera de la mio piel / y equí tas / sicasí, / exerciendo con derechu plenu / una nacionalidá conquistada / a golpe de tenrura".
Del tueru salen les cañes del presente y del futuru en forma de resume: delles variantes d'un mesmu tema válen-y pa confirmar les hipótesis y pa llendar lo imprescindible; apaez la suave y poderosa presencia del fíu: "Voi cosete unes ales bien fuertes / colos mios propios deos / hasta que sangren / si ye preciso. Voi afalagate con ellos, / siempre. / Anque yá nun tea". Axunta equí la calma de la madurez, les intenciones, los balances y les contabilidaes, la reflexón sobre l'oficiu de la poesía, la inevitable presencia de la muerte y l'atrevimientu pa francer les convenciones, por exemplu, con una instancia romántica, un melancólicu avisu de prensa o un humanitariu anunciu de periódicu onde allampa por un abellugu coles condiciones afayadices pa la felicidá: "Vistes a un arboláu, / llibros y bona calefacción?"
"Dicen los árboles / que falen la mio llingua / y créyolos". Árboles y versos son bona compañía pa la vida. Elvira Laruelo sábelo y regala, xenerosa, la so guapa versión de la convivencia ente les sos fuerces naturales favorites. Quedamos, con gana, a la espera de la fueya nuevo.
