Cuando'l catalán Gabriel Ferrater publica en 1966 el so llibru Teoria dels cossos ( Teoría de los cuerpos), xunta nun mesmu versu a dos poetes que güei xulgaríamos distantes: Jorge Luis Borges y Robert Lowell. Failo nel poema "Los aristócrates", onde opón la obra "patricia" d'esos dos americanos a la suya plebeya. Frente a Borges, el poeta de la perfección formal y de la intelixencia, Lowell ta consideráu'l padre de la poesía confesional americana, la que va identificar vida y lliteratura, la corriente que más siguidores llogra non siempre con bonos resultaos. N'apariencia lo más opuesto al xeniu formalista del arxentinu. Sicasí, lleendo agora ordenada nesta edición completa n'español, en dos tomos, la poesía de Robert Lowell (1917-1977), nun pudimos evitar alcordanos del poema de Ferrater y d'esa intuición que lu fexo relacionar a esti poeta con Borges.
Y ye que Lowell empieza escribiendo los sos primeros llibros na sienda del modernismu americanu d' Eliot y Pound, Moore y H. D., Stevens y Williams: una poesía elegante, selecta, distinguida. Nesa llinia va ganar en 1946 el premiu Pulitzer cuando publica'l llibru El castiellu de Lord Weary. Nos años cincuenta entra en contactu cola poesía que taba escribiendo en Gran Bretaña Philip Larkin, conscientemente antimodernista, pa la qu'embrocaba les sos impresiones personales, la so propia vida, y Lowell va decidir tresladar a los sos propios versos esi material autobiográficu, del que va nacer Life Studies ( Estudios del natural), publicáu en 1959. Considérase esi llibru una de les pieces clave del confesionalismu, la corriente que punxo a disposición de los poetes la sexualidá como material poéticu, el cuerpu y les sos mancadures, pero tamién les firíes sicolóxiques y morales. Lowell impartió un taller de poesía al qu'asistieron Sylvia Plath y Anne Sexton, dos de les principales representantes d'esta corriente, como tamién lo son Randall Jarrell o John Berryman, colos que compartió amistá. Sicasí otra amiga, Elizabeth Bishop siempre-y censuró l'usu y l'abusu que llegó a facer de la propia biografía (y de la que los rodeaben) como material poéticu.
Depués de publicar Estudios del natural dio la impresión de que Lowell se resistía a siguir la corriente confesional; potenció la so voz pública, faló de política y de cultura, d'historia, procurando distanciar la propia biografía de la so obra. A mediaos de los años sesenta dio voz (poética y contracultural) a les marches civiles contra la guerra del Vietnam y foi una referencia social pa la cultura americana. A esi Lowell, patriciu (padre de la patria), ye al que seguramente se refier Ferrater nel so poema "Los aristócrates". Más tarde Lowell va afondar na llinia confesional poniendo en versos elegantes y distinguíos los trapos sucios propios y de la familia (de manera dolorosa los de la fía, hasta'l puntu de que la so amiga Elizabeth Bishop-y llama l'atención públicamente). Esta poesía completa qu'agora s'edita mui bien traducida por Andrés Catalán permítenos apreciar la evolución d'una de les voces más influyentes del sieglu XX, l'aristócrata (que lo yera realmente, descendiente d'ún de los colonizadores del Mayflower) que más fexo por que se democratizara la poesía, seguramente de manera involuntaria.
