Na primer ilustración d' Asturploitation apaez la vergonzosa escalera d'entrada a un cine en Belzoni (Misisipi) acutada pa xente de color; yera 1939, la segregación venía de vieyo y ochenta años después inda queden escaleres que xubir. La semeya introduz la temática del llibru: la necesidá de que la vida real y la creada pa la ficción vayan xuncíes, porque ye precisamente esa cercanía la que-y da l'ésitu al cine y a la televisión, cuando la sociedá se ve reflexada ya identificada na pantalla. Eso esplica'l neoloxismu d'un títulu ambiciosu que quier pal públicu asturianu lo mesmo que'l blaxploitation algamó pa les minoríes negres: identificación y reconocimientu. El periodista Damián Barreiru Maceiras (A Estrada, Pontevedra, 1984) consiguió'l Premiu d'Ensayu "Máximo Fuertes Acevedo" con esta propuesta, cola que confirma que perconoz el sector y qu'escribe cola eficacia yá demostrada nos ensayos anteriores L'espeyu onde miranos (Premiu "Fierro Botas" 2013) y Caleya Sésamu: el papel de la televisión na tresmisión interxeneracional d'una llingua (Premiu "Máximo Fuertes Acevedo" 2014).
Esti percorríu pela historia del cine y la ficción televisiva empieza en Hollywood con The Jazz Singer (1927), la primer película con voz. Vinieron después la comedia ranchera, el wéstern, el cine de lluchadores o'l qu'espeyó conflictos ente países; telenoveles, series y el boom del celtic noir, un subxéneru qu'escarba nos requexos más avesigos del alma atlántica y que seique pueda tar allampando por Asturies como materia poética. Al marxe de la industria estranxera, estes páxines repasen de manera especial el cine y la televisión en delles cultures y llingües peninsulares. Dende los primeros trenta, cuando llega'l cine sonoru norteamericanu, munches son les películes qu'anduvieron a la par de la nuesa historia, como Morena Clara (Florián Rey, 1936), la qu'acompañó a los españoles nuno de los tiempos más tráxicos del país. La ficción televisiva española ye un capítulu qu'apunta pa dalgunos momentos fundamentales ensin escaecer el papel de dos asturianos: Narciso Ibáñez Menta y Juan José Plans. Darréu vienen los finxos del cine y la televisión en catalán, vascu y gallegu; un camín munches veces abegosu porque les llingües propies y la llibre espresión del arte taben torgaes pola censura, pero interesantes exemplos los tres de cómo ser quien a producir con ésitu al poder facelo nos sos idiomes.
Una parada prestosa pal llector asturianu va ser la estaxa de la cultura del país qu'entama en 1905 col estrenu de la primer película asturiana de ficción, El robo de fruta, de Javier Sánchez Manteola. De 1979 ye Las aventuras de Pinín y sus amigos, dirixida por José Antonio Arévalo y con guion d' Alfonso Iglesias. Foi'l primer llargumetraxe español qu'adaptó a un personaxe del cómic, tien dagunos diálogos n'asturianu y la temática resulta mui actual: l'esmolimientu y l'activismu de la mocedá pola mor de la contaminación nel so pueblu. La parte final ta reservada pal audiovisual n'asturianu nel qu'hai nomes reconocíos como Gonzalo Tapia, Sergio G. Sánchez, Tom Fernández, Ángeles Muñiz, Ramón Lluis Bande o Pablo Quiroga y l'anuncia de la que será la primer serie de ficción rodada n'asturianu: Muyeres inesperaes, d' Adolfo Camilo Díaz.
Vista enciclopédica y minuciosa, esposición clara y amena, anecdotariu pertinente y didácticu y argumentación bien traída p'apontonar non solo les conclusiones, sinón tamién un conxuntu de propuestes concretes y un encamientu a l'alministración pa que sofite al sector audiovisual asturianu col procuru de qu'esti faiga productos axeitaos al so entornu: "La ficción tien que reflexar la nuestra forma de vida y ayudar a preservar la identidá del territoriu al que se dirixe y énte'l que respuende". Quedamos n'esficies d'ello.
