Agrandóse aínda más el corpus de la lliteratura asturiana cola recién torna de Pablo Suárez García que fizo del Drácula, de Bram Stoker, resultando un trabayu d'aciertu y procuru. El bon llabor d'esti traductor nun ye nuevo teniendo en cuenta que yá traxo a les nuestres lletres títulos de sonadía como Tirán el Blancu, de Martorell, les Obres Completes d' Ausiàs March o El Suañu, de Metge, por dicir solo dalgunos. Agora aporta un símbolu eternu de la lliteratura, eternu en muncho sentíos. Dende'l puntu de vista internu pola obivedá d'atopamos con un ser inmortal, o cuasi, que s'alimenta de sangre humano pa caltenese con dalgo paecío a la vida o, siacasu, a una non-muerte. Dende'l puntu de vista esternu a la hestoria en sí, Drácula resulta un personaxe que trescala países, cultures, xéneros artísticos y tradiciones. La so eternidá empobina per carreros insospechaos que van del cine al cómic, pasando pela escultura la cultura popular de xuguetes y oxetos de coleccionismu, y aportando a toa triba de versiones y variaciones en medios espresivos bien estremaos. Drácula supera les llendes de la novela que lu vio nacer como pocos personaxes imaxinarios ficieron. La novela entama nesta edición con un prólogu pertinente y mui correctu de Milio Rodríguez Cueto, que s'esplaya sobre eses variaciones, efectos y referencies del universu vampíricu.

De mano, y dicho lo anterior, convién partir, a riesgu de trayer duldes sobre'l criteriu estéticu o de conocencia lliteraria del reseñista, que Drácula ye una novela mediocre si atendemos a la estaya formal. El desendolcu ye a vegaes cansín, los personaxes nun paecen destacar poles sos lluces intelectives (quitando a Van Helsing, qu'en tou casu tampoco pue dicise que sía mui aceleráu a la hora de tomar decisiones), les descripciones espaciales son curties y poco sólides, nun sé sí la técnica de narración al traviés de cartes, telegrames, diarios supón la manera más afayadiza de cuntar la trama, y dalgunos capítulos de la novela podríen ser prescindibles en cuanto que nin amesten información, nin consiguen crear nengún efectu dramáticu acullá d'amenorgar el ritmu de la hestoria ensin necesidá. ¿Nun paga la pena entós traducir esti llibru al asturianu o, una vegada traducíu, lleelu? N'absoluto. Porque estes apreciaciones conviven con too aquello que convierte a Drácula nuna símbolu que definí como eternu: unes fuertes evocaciones emocionales. Bram Stoker llogra crear un personaxe únicu, con un arna incomparable de misteriu, seducción, poder físicu y psíquicu, y sobre too capacidá de xenerar ecos na creatividá y les pulsiones de xeneraciones y xeneraciones de llectores. Los personaxes qu'apaecen na novela contienen como arquetipos tolos personaxes que podemos pensar de la mayor parte de ficciones que tovía hoi acorrompinen los escaparates de les llibreríes. Y percima d'ellos, homes y muyeres, Drácula llevanta como estatua o estandarte de la permanencia, de lo invencible.

Y de l'ausencia. La primera cuarta parte del llibru refier la llegada del pasante d'abogáu a Transilvania, al castiyu onde vive Drácula aparentemente solu. Estes páxines abúltenme sobresalientes. La tensión xuega col llector pa metelu dientro de la hestoria y sacalu dacuando pa que respire l'aire de la esperanza. Depués volvemos al castiyu y comprobamos que la esperanza ye una pallabra que Drácula nun utiliza nel so diccionariu particular. A poco y a poco descubrimos que la llegada de Drácula a Inglaterra nun será la d'una persona normal. Un ser d'otra naturaleza va espurrir les sos redes d'atracción y terror pel mundu civilizáu, fuera por tanto de los vacíos de la Rumanía transilvana. Ellí onde hai meseta y ausencia de persones, cambia pol fervollar de la vida na ciudá. Y dayuri, Drácula ta ausente. Inclusive nel estrictu final de la obra (nun voi revelar cómo termina, claro) Drácula vuélvese ausencia. Seique una razón del efectu que Drácula caltién en llectores y creadores sía esa non-presencia yá dende la falta de persones al rodiu del castiyu, l'ausencia de persones dientro de dicha edificación y la propia ausencia de Drácula mientres tola novela. Drácula malpenes apaez y cuando lo fai espreceta pola so crueldá. Nun hai piedá en Drácula, y la imposibilidá de percibilu más que poles señales de les sos falcatrúes forma parte del carisma que conserva al traviés de los años. Drácula, como un ecu, ye una silueta o una solombra. Los personaxes que lu persiguen a lo llargo de la novela anden a tientes y en tientes, y Drácula xuega con ellos, espera, vixila, mata, y namora.