La lliteratura en gallego-asturianu tien muncho qu’ofrecer y la revista “Trabatel”, dende l’añu 2008, ye’l portal onde alcontrar nomes nuevos y siguir el trabayu de los conocíos; con una cuidada esbilla qu’asegura calidá, la publicación ta consolidada como l’escaparate de referencia pa dar anuncia de les lletres del estremu occidental asturianu. Son les palabres de Berta Piñán les que saluden y agradecen el númberu de la seronda del añu 2020, nel que participen doce escritores venceyaos a la creación en prosa y versu, la traducción y la crítica. Como ye vezu, tolos collaboradores vienen presentaos con una glosa vital que los contestualiza na zona, amás d’apurrir les notes qu’informen de les sos trayectories lliteraries y un individualizáu afalagu editorial que los anima a la continuidá nel oficiu. Veteranía y mocedá xuncen bien nes páxines compartíes d’un volume editáu con gran procuru y arriquecíu coles imáxenes de la fotógrafa asturiana d’orixe rusu Sveta Poutilina.
Nesta ocasión ye mayor el númberu de collaboraciones narratives, qu’entamen pola aportación d’Emma Méndez titulada “El vecín”, un relatu entrañable sobre’l pasu del tiempu, la soledá y el valor de la memoria y los recuerdos como tenques de salvación. José Manuel Martínez Castro esplora posibilidaes discursives en “El candidato”, l’orixinal percorríu pelos pensamientos obsesivos d’un protagonista destináu a un desenllaz sorprendente. En “Paco Migas, el último comepecaos”, Martin de Villar debuta na revista aprovechando una curiosa costume enraigonada en cultures vieyes, mientres constata la natural convivencia –anguaño perdida- de la sociedá cola muerte. En “Fora de tempo”, Luisa Méndez Fernández inspírase na actualidá y acuriosa un sentíu monólogu interior que surde énte la pandemia y que val pa rebelase contra les pérdides irreparables qu’asuelen l’alma. Manuel Calvín Corredoira demuestra ser un escelente narrador al estilu tradicional en “Por se lle apetece escribir”, “A festa das cereixas” y “A culpa levárona os gatos”, tres cuentos humorísticos que bieben de la oralidá. Alberto Castro Gión vien trabayando nun proyectu con finalidá de serie narrativa de división estacional; nel fragmentu que pertenez a “Brao” disfrutamos de la emocionante posibilidá d’acompañar a los entusiastes Lorca y Casona mientres anden los llugares de Santalla d’Ozcos coles Misiones Pedagóxiques, pero tamién al buscu de les histories que guarda la zona, como los secretos d’El Valle del Desterrao o la impresionante guapura del saltu d’agua d’A Seimeira. En “Tempos de llobo”, Alejandra Gayol Rodríguez sotrípanos l’alma al proyeutar l’entendimientu d’una nena pa contar la historia d’un topu durante la guerra civil. La coleición de traducciones de testos d’autores clásicos entamada por Xosé Miguel Suárez Fernández suma un nuevu capítulu cola versión del relatu de Virginia Wolf que lleva por títulu “A marca na parede”. La parte de la crítica lliteraria fírmala María José Fraga Suárez, qu’esmenuza’l poemariu de Conchita Álvarez Lebredo Na palma da túa mao. Na estaxa de la poesía, Ricardo Saavedra Fernández-Combarro axeita “El silencio”, un llargu poema d’alcordanza a so madre; Inmaculada Méndez Freije compón “Sin herba”, versos de sentimientos que se funden cola naturaleza y Lucía Iglesias Gómez trabaya’l ritmu a base de paralelismos y repeticiones pa falar d’amor y dolor en dos composiciones: “A tiseira” y “A incre”.
“Y pasa outro día entretido en mil recordos, contos y pensamentos que, ás veces, encontra a quén contallos […] namáis pra qu’os d’agora nun esqueizan d’únde vein y sepan valorar únde viven y recorden á xente que tuvo aquí antias qu’ellos». Valen les palabres d’Emma Méndez pa encamentar la llectura d’estes páxines; tamién pa certificar qu’escriben una llingua de presente y de futuru.
Trabatel nu 11
Xosé Miguel Suárez Fernández
Distribución de baldre, 62 páxines
