Suscríbete

Contenido exclusivo para suscriptores digitales

con llingua propia

Un home que cava

El cuadernu del cineasta Bande

Cultura - Libros

El llabor de Ramón Lluis Bande (Xixón, 1972) precisa de la imaxe y de la palabra; televisión, cine, prensa y lliteratura configuren el so llargu y constante universu de creación, y anque dambes fuercies son complementaries nel so oficiu, dacuando ofrezles –aparentemente– separaes. Siguiendo un camín yá abiertu n’entregues anteriores, llega agora un almacén de testualidá, Un home que cava, les páxines d’un nuevu cuadernu de trabayu, circunscritu a un tiempu determináu, que’l cineasta foi axeitando con diferentes estímulos, posibilidaes y realidaes de proyeutos, pero amañando un conxuntu que ye tamién, en sí mesmu, una unidá lliteraria de bon nivel llingüísticu, artísticu ya intelectual y que resulta un ensayu humanísticu nel más completu significáu de lo humano, fechu con precisión descriptiva, narración amena y episodios de calidez poética.

Cuando’l filu conductor más evidente del relatu ye una entidá material, ha de trabayase de manera espresa un exerciciu que demuestre l’estilu personal, reforzáu pol enclín a escarbar nunos llugares repetíos y allumaos pola versión d’unos referentes teóricos que s’afiten como imprescindibles. Y resulta un aciertu’l fechu de que la primer persona garre distancia y quede anubrida por un narrador omnisciente que perconoz al protagonista, “el cineasta”, l’home vixiláu mientres se prepara pa contar lo que ve. Nesta confesión arrogante descúbrense abondes fontes d’inspiración esterna: les reflexones de maestros en distintes estayes, dende Claude Lanzmann con Shoah, “la película más importante de la historia del cine” a Pasolini y Jonas Mekas; Agota Kristof y Marguerite Duras; Kazimir Malévich y Cézanne; dalgunos de los argumentos por ellos espuestos valen p’aguiyar o pa confirmar una idea propia que ta aniciando, al mesmu tiempu que los estímulos xurdíos d’una llaparada espotánea llelden nel güeyu del que ye quien a tresformalo too nun mundu que rebobina, pero que nun pierde por ello un migayu de realidá. Les tomes alcancen gran emoción cuando s’afiten sobre la memoria de los que siguen velando a los desapaecíos nos crímenes del fanatismu universal y llocal, gracies a secuencies que sotripen l’alma del llector y seique del espectador, que sicasí queda confortáu cola dignidá nel comportamientu de los llamaos a convertise n’héroes domésticos. La ideoloxía y la revolución trátense con vocación de serviciu, igual que’l reconocimientu a homes que fixeron la nuesa historia y que comprometieron la vida pa contala y defendela, como Juan Antonio Cabezas, Constantino Suárez y Belarmino Tomás. Cola esplicación de cuestiones de loxística y filosofía del cine, la evolución del pensamientu hasta ser imaxe, el procuru pa depurar les interferencies que nun contaminen la esencia del mensaxe y la consideración de les consecuencies emocionales coles que s’arrecostina al abrir toles puertes del procesu técnicu y artísticu, complétase’l percorríu peles páxines d’esti cuadernu.

Son les palabres de Walter Benjamin les que-y empresten el títulu: “El que quiera averase al so propiu pasáu sepultáu tien de comportase como un home que cava. Esto determina’l tonu, l’actitú de los recuerdos auténticos. Estos nun tienen de tener mieu a volver una y otra vuelta sobre ún y el mesmu estáu de coses; espardilo como s’esparde la tierra, llevantalo como se llevanta la tierra al cavar. Yá que los estaos de coses son namás almacenamientos, capes, que namás dempués de la más cuidadosa esploración entreguen lo que son los auténticos valores qu’escuenden nel interior de la tierra: les imaxes que, desprendíes de tou contestu anterior, tán asitiaes como oxetos de valir». Cola pluma cavó Seamus Heaney, n’alcordanza de la estirpe: “Yo nun tengo una xada pa siguir a homes como ellos”. Cava Bande con pluma y cámara, les sos ferramientes nesti llabor bien fechu.

Este pequeño arte

Kate Briggs

Jekyll&Jill

440 páginas 

24 euros

Compartir el artículo

stats