Malpenes pasó un añu del so anterior poemariu, El pesu de la lluz, y les suertes de la edición y los premios n’asturianu faen qu’aporte un nuevu llibru de Gonzalo G. Barreñada, concretamente’l ganador del premiu “Xuan María Acebal” de Poesía, El llar n’orde. Comienza arriendes con una poética: “Ún nun se sienta a escribir poesía: Llega a casa”. Hai salgo casual na inspiración lliteraria, una fiebre o aturdimientu de la consciencia pela que filtria’l versu. A partir d’equí Barreñada propón un poemariu biográficu no esencial, onde da un percorríu a la identidá propia, y la vida va construyéndose versu a versu, o quiciás ye otra vida la que se construye distinta a la del home que foi amunchayá. Formalmente, sigue banciando ente poemes llargos y curtios, escoyendo los versos d’arte mayor, y la mayúscula al principiu de cada versu. Esti vezu nun tengo claro que sía mui acertáu en cuanto que ruempe encabalgamientos davezu, y conduz a confusión o a interpretaciones demasiao abiertes. Con too, l’escritor de Sotrondio destaca pol procuru que pon na escritura y na narratividá de los poemes como hestories llíriques del mundu que cunta. Nos poemes llargos busca’l razonamientu y el entendimientu, la complicidá de la razón. Nos poemes curtios adebez el rellumu del intre, la belleza de lo eterno que dura quién sabe cuántos díes de poesía: los mesmos díes que trescurren nestes páxines. Conseña’l debalar diariu, la vida como dalgo llano y cenciello, fecho de frebes llixeres. “Piensa esto: nun hai llugar / Del tiempu más absurdu / Qu’esi onde yá esiste l’ecu”. El poeta busca’l mediu xustu nel carácter (más paecíu a la ma qu’al pá), ye indulxente colos defectos (los primeros los de so), nun tien más patria qu’aquella que prefier por gustu, pero guarda alcordanza del llugar de nacencia.
Hai señardá tamién nestos poemes: “Fuera, mientres tanto, morría tamién / Dende cuantayá / Y a poco y a poco /El país nel que vivíemos”. La casa llariega furrula como símbolu (cásique un llugar común na poesía asturiana y universal), y los sos habitantes falen del pasáu y del futuru como espacios reales: “Yá nin siquiera sé cómo dicir agora / Que’l pasáu arde / Y que’l futuru / Siempre ye / El país más triste de la tierra”. Barreñada lleva a la poesía los díes d’abril a manera de rexistru reflexivu: “¿Qué ye’l fracasu? / ¿Ye esta lluz de la tarde sobre’l ríu?”. L’escritor detién el pasu y mira, y nesi mirar acompáñalu la poesía pa tresnar versos a manera de retratos del ablucamientu. Dexa nel papel les impresiones que la vida-y apurre. A vegaes asitia y fecha’l poema: Porrúa, L’Entregu, París, Florencia... N’otres ocasiones, afita’l poema nuna llocalización más concreta: un muséu, una ciudá, un camín, el mercáu de la infancia. Anota los socesos y los sentimientos: “Nun sé si esto ye un poema. / Siempre conmigo llevo esti cuadernu / Pa escribir nél tolo que pienso”.
Otru aspectu interesante nel poemariu refiérse al tonu elexiacu o proféticu de dalgunos poemes. Tal paez que’l testu furrula a manera d’oráculu moral, onde’l poeta exerce d’oficiante y responsable del bientar del llector. Aconseya y disculpa los fallos propios y d’otros. “Cierto ye que siempre ye más fácil llora-y a un desconocíu qu’a un amigu; los estraños nun conocen entá los defeutos que tenemos”. Nada humano-y ye ayeno. La vida pasa. Barreñada llega a vieyu, o asina se siente él. El conceptu de vieyera y les implicaciones de la mesma espúrrense pel poemariu como una mancha inevitable. El Tiempu con mayúscules suena a amenaza: “De la paré quites el reló / Pa ponelu n’hora”. Piensa que les persones son más bien bones que males. ¿Y él? Él namás respuende a les preguntes sobre’l Tiempu: “¿Taré siendo yo tamién / Esta mesma tarde de primavera / Solombra y lluz d’otros? / Un ecu de la vida”. Y seique sía esti’l versu que meyor resume esti poemariu de llectura prestosa, meditativa y calmosa. La poesía como ecu de los díes. Díes n’orde al fin y al cabu.
El llar n’orde
Gonzalo G. Barreñada
64 páxines, 13 euros
Trabe, Uviéu, 2020
Cola ayuda de la Conseyería de Cultura, Política Llingüística y Turismo del Principáu d’Asturies
