La Nueva España

La Nueva España

Contenido exclusivo para suscriptores digitales

Un llibru pa ser lleíu

Paquita Suárez Coalla escribe hestories sobre les llendes de la realidá, sobre les sombres que separten fumu y llume

Cultura - Libros

Esti llibru guapu pa la reciella entama con una pregunta: ¿pa qué sirven les pallabres? Y la respuesta de Lucía a esa entruga ye tan cenciella como fonda n’implicaciones. Les pallabres sirven pa dormir y pa quedar espiertos. Les pallabres son pa construyir cualesquier mundu, y esi riesgu potencial de les pallabres conviértenles na gran capacidá del ser humanu. Llevamos milenios cuntándonos hestories, y cada hestoria recuerda al primer cuentu que nos cuntaron cuando nenos. Tienen toos ellos dalgo de primixenio o de raigañu. A partir d’esa fantasía inicial van texéndose toles narraciones y poemes que siguen na vida de una persona llectora, esa especie nun sé si en peligru d’estinción pero que cada vegada cuesta más atopar nos asientos del metru, por poner por casu. Paquita Suárez Coalla trainos equí unos “Cuentos pequeñinos y grandes pa dormir y pa quedar espiertos”, y con ellos descubrimos la infancia y los valores que nos representen como persones al traviés del tiempu. Bona parte de quién somos naz nos cuentos qu’escuchamos de los mayores. Lucía escucha a so madre y entiende pa qué sirven les pallabres.

¿Y qué atopamos nestos rellatos? Munches de les esplicaciones del mundu infantil, y tamién dalgunes zunes que perdemos quién sabe pa qué necesidá cuando nos volvemos adultos. Lucía quier conocer la utilidá de les pallabres y la madre va debuyando hestories. La técnica narrativa, que l’autora emplega pa ordenar y ufiertar coherencia al llibru, consiste n’intercalar comentarios de Lucía y la madre entre los cuentos independientes, con un cierre final que termina de da-y unidá al conxuntu. Asina, descubrimos qu’a Nidia présta-y muncho dormir porque cada día ta enllenu de sorpreses. La mascota de Graciela ye una grana de carbayu. Aitana figúrase que ye una baillarina de ballet y a la hermana nun-y paez bien esi tracamundiu de la imaxinación. Isabel y Alba atopen un paxarín y deciden salva-y la vida. Camila y Alma han esconder el gatín siamés que colaron en casa ensin que se decate la güela. Sofía y Ana piérdense nuna fiesta de prau y les madres respectives, toes azacanaes, busquen a les nenes pel pueblu. Marina acaba cumplir ocho años y tien mieu al aire. Y nel últimu y más llargu corte del llibru, Cecilia tien una gran idea que pasa por dexar de dir a la escuela y ser madre. Y entós ella y la madre cámbiense’l trabayu. Pronto alvierten adultos ya moces que cada edá tien les sos dificultaes y enzancos.

Realismu máxicu, imaxinación llibre y sentimental, delicadeza na prosa. Paquita Suárez Coalla escribe hestories sobre les llendes de la realidá, sobre les sombres que separten fumu y llume. Nes cabeces de los nenos los suaños sirven pa vivir y sentir aquello que nun puen vivir y sentir espiertos. Y al esconsonar los suaños vienen con ellos, fáense un poco verdaderos. “Anxelina baillarina” fala del poder de la imaxinación como creadora de realidá. Los nenos y nenes tienen esa capacidá de volver verdadero lo qu’esiste na so imaxinación infinita. ¿Pue convertise un páxaru en flor? Sí. Pa un nenu abulta cosa bien cenciella. ¿Puen vencese los mieos? Sí, cola fuercia de la diversión y la inocencia. Porque esa ye otra característica d’estos cuentos: la mirada inocente de les nenes que los protagonicen. El mundu consiste en lóxiques qu’elles entienden con pura inocencia, y somos los adultos los que francemos too aquello, emporcando los razonamientos infantiles con prohibiciones y escepticismu. Cada día na vida d’un nenu ye l’últimu día y el primeru al empar. Paquita Suárez Coalla afronta’l retu con poesía y procuru. Un llibru prestosu pa lleer y, meyor aínda, pa ser lleíu a la xente menudo.

Un llibru pa ser lleíu

Un llibru pa ser lleíu

Cuentos pequeñinos y grandes pa dormir y pa quedar espiertos

Paquita Suárez Coalla

Trabe, 96 páxines, 12 euros

Cola ayuda de la Conseyería de Cultura, Política Llingüística y Turismu del Principáu d’Asturies

Compartir el artículo

stats