Hubo una dómina na que na lliteratura asturiana abondaben los llibros de rellatos, quiciás por mor del feliz espoxigue incontroláu de premios lliterarios nesti xéneru. Dalgún estudiosu habría de poner en rellación el desendolcu de la lliteratura asturiana y la esistencia de premios lliterarios. Aquellos tiempos de bayura cuentística pémeque pasaron. Asina que nun pueo dexar de saludar cola mayor allegría y bones espectatives la espublización de “Vides célebres y otros cuentos chinos”, de Pablo Antón Marín Estrada. Vaya por delantre que lleer a Marín Estrada supón un gociu técnicu pa quien xunta lletres con ánimu d’escribir obres lliteraries. L’autor remana un asturianu lliterariu y una espresividá difíciles d’igualar. Esti llibru de rellatos constituye, ensin dulda, una folixa pa los llectores atentos en cualesquier de les dos partes, bien diferenciaes, que lu estructuren. La primer parte acarreta una referencialidá evidente de Schwob, Cunqueiro o Castelao. En poques páxines, Marín Estrada narra vivencies puntuales o percorríos vitales d’Elvis Presley, Lady Godiva, Superman, Emily Dickinson, Leopoldo Fregoli o Carlota Corday. Suel preferir los momentos últimos, la muerte como representación metafórica de la vida d’estos personaxes, que gracies a la ficción del escritor llangreanu garren una nueva vida o una fastera d’evocaciones estremada de la idea que podamos guardar d’estos personaxes reales o mitolóxicos, si ye que teníemos dalguna (que sinón siempre pue ser una puerta d’entrada bona entamar por estos rellatos p’averase a estos personaxes). Destaquen pamidea “Clark Kent mata a Superman”, “Los muertos nun dan la cara”, “El caballeru, la muerte y el diablu” o “Los reconcomios de Ulises” ensin restar méritu a otros cortes.
La segunda parte del llibru, la que vive baxo la sombra de ser “cuentos chinos” y a mi prestóme más, recuerda a aquellos testos del primer Marín Estrada nos sos diarios o en “Xente d’esti mundu y del otru”. Son cuentos de tres clases: los que se cuenten cabo’l llar en nueche d’iviernu o tardes de vagar, los cuentos autobiográficos y los cuentos culturalistes. Nes tres estayes l’autor algama la meyor calidá de tola obra. La primer clas correspuende a esos rellatos que remiten a dómines escures o mui llonxanes, cuando les amistaes y les enemistaes yeren otres, pueque más llimpies. Son personaxes cenciellos, solitarios, y asustaos. Hai un puntu paranormal y un humor negru qu’escarabica les coraes. Tamién apaez dalguna bisarma, faltones y seres risonderos, babayos, y muyeres y paisanos d’infantería, normales ensin más. La mitoloxía personal xunce cola mitoloxía popular. Seres al aldu que busquen una esplicación al mundu. Pela otra cueta, tan los cuentos onde Marín Estrada escucha les voces del pasáu y recuerda coses de cuando mozu y esi mundu taba por descubrir. L’esllumamientu de la inocencia sirve pa narrar con coña cuánto de distintos yeren los años pasaos en comparanza colos años actuales. Y dientro del imaxinariu del escritor hai sitiu arriendes pa les referencies culturalistes, les hestories que beben de la Hestoria y traen una enseñanza o un pensamientu. Los llibros y los escritores más variaos apaecen per estes páxines ensin que dalguién sía p’apotar cuándo una cita ye verdadera o pura lliteratura. En cualesquiera de los estilos qu’use l’escritor sobresal pola fuercia espresiva, la capacidá de crear personaxes vivos, el talentu pa narrar como que se facía hai cuantayá en tiempos qu’escarecíen de distracciones electróniques. “Vides célebres y otros cuentos chinos” ye una gozada, un exemplu depuráu de cierta cuentística tradicional, oral, coñona, cenciella, y humilde na so grandeza.
Lleer esti llibru reconcilia cola lliteratura como forma d’escapar de la vida y deprender d’ella. Marín Estrada recopila asina unos rellatos que foron apaeciendo n’“El Comercio”, y el puxu del encargu acabó nel nacimientu d’esta criatura tan guapa. Que vuelvan asoleyar les editoriales llibros de rellatos abúltame símbolu de remanecimientu y xusticia natural cola llingua asturiana. Y ye que la lliteratura llariega bebe d’esa fonte fabuladora que Marín Estrada retrata nesti llibru: rellatos que cuenten hestories de persones como nosotros, y nesa identificación col personaxe de papel atopamos la sida pa siguir lleendo.
Vides célebres y otros cuentos chinos
Pablo Antón Marín Estrada
Impronta, 296 páxines
17 euros
