Los homenaxes en vida son más prestosos que los obituarios. Pero dambos son más fáciles cuanto más averada a nós ye la persona que se mos va. Hai quince díes del tránsitu del teólogu Hans Küng, del que tocóme tar distante tola vida menos nuna vegada curiosa. Yera’l añu 1989 y el llugar la capital del Piamonte, Turín, una de les ciudaes que más quiero. Nin homenaxe nin obituariu sinón modestu alcuentru. Voi cuntalu a ver si peta.
Estudiaba yo na facultá d’humanidaes hasta´l mediudía y atopéme un cartelu qu’anunciaba pa esa tarde una conferencia coloquiu de Hans Küng. La direición quedaba lloñe del centru pero’l templáu aire de seronda afalaba a dar el paséu. Notaba qu’había una llínea trazada ente’l teólogu suizu y el mio mayestru amigu Gianni Vattimo, turinés de pura cepa. La llínea yera’l cristianismu, seya lo que seya en realidá cristianismu. El teólogu Hans taba dientro d’él pero casi fuera, mentes que’l filósofu Gianni taba fuera d’él pero casi dientro. Asina qu’arriméme con eses mires a la residencia de los padres xesuítes ú diba facese l’actu. Una casa sobria, seria, competente, como ellos mesmos. Hans Küng entró y sentóse enrriba del pequeñu estráu d’un aula onde taríemos unes trenta o cuarenta persones. Destacaba la so presencia d’estandoriu, con esi rostru d’home d’aceru. Esa cara qu’enllenaríase de saludables arrugues nes décades vinientes. Quien yera entós l’europeu católicu más alversariu del Papa reinante entamó a falar de la eleición de los obiespos. Taba pendiente la del obispáu de Basilea, si nun m’enquivoco, y Küng quería qu’existiera un protocolu d’eleición de los obiespos, puesto que ya había ún d’eleición del Papa polos cardenales. El públicu pilló’l mensaxe con güeyos de complicidá. Yeren homes y muyeres, ellos mozos, elles braves, con pinta de xente d’alta catequesis a la gueta d’un sitiu ideolóxicu. Metanes de Hans Küng de xuro que cuntaben tar nel llau progresista. El coloquiu valió-y al teólogu pa upase un pocoñín más con una comparanza que lu oldeaba con Pablu de Tarso. Dixo que él, Hans Küng, hubiere “resistío a Pedru”, esto ye, al Papa Xuan Pablu II. Entiéndese que resistía al sucesor del apóstol Pedru por culpa de varies custiones dogmátiques, en siendo la más maciza y duratible’l dogma de la infalibilidá de los Pontífices romanos. Y la mímesis fondera d’esa tema sal del textu bíblicu: ye la llucha ente Pedru y Pablu por liderar la nacencia de les ilesies cristianes.
Hans Küng tenía 61 años cuando lu conocí nestes que conté y tovía-y quedaben 32 años de vida nesti mundu. Lo último qu’escribió foi una carta al Papa Francisco recordándo-y que como teólogu católicu obedeciera siempre nel somantu de la Ilesia na esperanza de que’l dogma de la infalibilidá llegara a reconsiderase. Igual taba bien trayer equí l’anéudota de Xuan XXIII que sorraya la prensa nestes selmanes. Foi esi otru Papa quien convocó’l Conciliu Vaticanu II (1959) y llamó a servir n’él a un xóven Hans Küng y a otros nomaos teólogos que daríen munchu xuegu. ¿De qué va l’anéudota? Pregúnten-y al Papa Xuan XXIII pola infalibilidá y él respuende, más o menos: “¿Infalibilidá? Yo nun soi infalible. Meyor dicho, sí soi infalible pero sólo cuando falo “ex cátedra”. Y nun pienso falar asina enxamás”. El Papa Roncalli sí que gastaba sentíu del humor. Dixo eso y quedó tan anchu.
In-fa-li-bi-li-dá ye un pallabru perllargu, con demasiaes sílabes y vocación de traballingües. Pué qu’escuenda dalgún misteriu eclesiásticu pastoral. El mundu secular, por contra, falla y s’enquivoca ensin duelu, polo visto. Ya cun esu, alón.
Cola ayuda de la Conseyería de Cultura, Política Llingüística y Turismu del Principáu d’Asturies
