“La embaxada prieta” ye la quinta novela de Nicolás Bardio, un escritor que, magar la so mocedá, ta revelándose como ún de los más productivos y orixinales de la lliteratura asturiana actual. Na obra anterior, Bardio dexara constancia del so interés por facer una narrativa de xéneru arreyada a la Historia -real o inventada- d’Asturies. Anque esti oxetivu cuenta con precedentes nes lletres asturianes, naide hasta agora enseñara una influencia tan clara de los medios de comunicación de mases.
L’influxu de la paralliteratura, de la lliteratura xuvenil y de la producción cultural de mases forma parte del proyectu creativu d’esti autor, una característica que lu aproxima a Adolfo Camilo Díaz y a Vicente García Oliva. Bardio reivindica, de manera xeneral, el valir artísticu d’esti tipu de narrativa; dende esta posición, la so escritura empobínase a sacar a la lliteratura asturiana del espaciu minoritariu onde vive, llibrándola al espaciu global de la cultura de mases, cola convicción de que la llingua nun tien por qué ser necesariamente una torga pa ello.
A primera vista, La embaxada prieta ye una novela histórica que toma la materia narrativo de la Historia medieval del Reinu de Lleón, siguiendo’l camín iniciáu por otros novelistes como Xulio Arbesú o Xulio Viejo. Esiste, de fechu, una voluntá revisionista, de rotura col discursu históricu castellanocéntricu que fai qu’Alfonsu VIII de Lleón pasara a la Historia como Alfonsu IX, darréu que na numberación, qu’entama colos monarques del Reinu d’Asturies, metióse antes qu’él a Alfonsu VIII de Castilla, el so primu y enemigu.
Na novela, que ta ambientada nel sieglu XII, imaxínase un plan secretu d’Alfonsu VIII de Lleón (Alfonso IX nel discursu históricu oficial) pa facer una allianza coles corones de Portugal, Navarra y Aragón col envís de contener l’afán espansionista de la Corona de Castilla y evitar la guerra contra los almohades. Los mensaxeros, qu’habrán de superar grandes peligros, constituyen la embaxada prieta a la que se fai mención nel títulu.
Ye patente la intención de rehabilitar la figura del monarca lleonés reivindicando les sos polítiques -en especial la creación de les Cortes de Lleón, consideraes pola UNESCO como’l precedente más vieyu del sistema parllamentariu européu-. A esti fin amiéstase l’interés de mostrar los fechos históricos dende’l puntu de vista astur-lleonés, dándo-y la vuelta a la perspectiva popularizada a traviés de les composiciones épiques castellanes.
Nesti tresfondu asitia Nicolás Bardio a los verdaderos protagonistes de la novela, Quelino de Tresfoces y el so ayudante Bastián, dos monxos asturianos enfotaos en facer fortuna prestando los sos servicios a la burguesía y a la nobleza lleoneses nos “trabayos” -difamación, venganza, espionaxe…- que pudieran precisar pa consiguir los sos fines económicos o políticos. Con estos filos, úrdese una historia onde s’entemecen elementos de la narrativa criminal y d’espíes col ritmu alloriante de los thriller cinematográficos.
Trátase, en definitiva, d’una novela d’acción, más allá de l’ambientación medieval y l’espíritu lleonesista, o asturianista, que la sustenta. El testu bebe de munches fontes: Quelino de Tresfoces y Bastián evoquen inevitablemente a los protagonistes d’ “El nome de la rosa” d’Umberto Eco y, a traviés d’ellos, a Sherlock Holmes y a Watson. De fechu, la historia ta contada por Bastián, dende la posición del aprendiz qu’admira la capacidá d’análisis del so maestru.
Nicolás Bardio resulta efectivu por demás a la hora d’alministrar el suspense y brindar sorpreses. Con too, échase en falta una mayor atención a la verosimilitú y a la resolución d’un final que llega sin una preparación suficiente. La novela gana cuando fai pensar en Conan Doyle y pierde pie cuando recuerda, por cuenta de la precipitación, a Dan Brown. Resulta, en tou casu, perinteresante’l cuestionamientu que fai del discursu históricu, recordándonos, una vez más, que la Historia que conocemos ta escrita polos vencedores.
Cola ayuda de la Conseyería de Cultura, Política Llingüística y Turismu del Principáu d’Asturies
La embaxada prieta
Nicolás Bardio. Hoja de Lata, 2021, Xixón 298 páxines
17,90 euros
