La Nueva España

La Nueva España

Contenido exclusivo para suscriptores digitales

con llingua propia

Un “country noir” asturianu

Sidoro Villa exhibe maestría llingüística y fondura psicolóxica en “Pielgos de llercia”, una novela negra rural

Cultura - Libros

Depués del parón causáu pola pandemia, la edición n’asturianu ta recuperando’l pulsu, sorprendiéndonos, amás, cola apaición de bien de noveles interesantes que vienen a equilibrar el pesu de la prosa con respectu a la poesía nun campu onde solía dominar el xéneru llíricu. Esti espoxigue de la novela nútrese cola obra d’escritores mozos como Blanca Fernández o Nicolás Bardio y benefíciase del cambiu de trayectoria d’otros, como Manuel García Menéndez y Sidoro Villa Costales, que nos últimos tiempos cambiaron la lliteratura infantil pola narrativa p’adultos.

Sidoro Villa Costales estrenóse como novelista con “A estaya” (Impronta, 2016), a la que siguió, poco depués, “Tres beyuscos” (Impronta, 2019), consiguiendo’l favor del públicu y l’atención positiva de la crítica. Nel 2020 algamó’l premiu “Xosefa Xovellanos” cola novela “El fervinchu”, que ta por editar. Toes estes noveles comparten, perriba de les sos diferencies temátiques, l’allugamientu n’Asturies –sobre manera na Asturies rural– y l’enclín polos personaxes populares, dos característiques que de mano paez qu’aboquen la escritura del autor al costumismu, una tentación que Sidoro Villa sabe evitar o más bien trescender.

“Pielgos de llercia” combina estos rasgos coles convenciones de la narrativa de detectives siguiendo la tendencia creciente na novela criminal d’anguaño a enmarcar les histories n’ámbitos rurales, pa lo que Sidoro Villa cuenta con precedentes, na lliteratura asturiana recién, n’escritores como Roberto González-Quevedo o Berta Piñán. El “country noir” o novela negra rural n’asturianu evita’l tremendismu y los crímenes retorcíos a lo “True Detective” pa centrase nes posibilidaes narratives qu’ufren a los autores el contraste ente lo visible y lo aparente, que frañe, de manera amenazadora, los mecanismos tradicionales del control social, y la presencia d’una naturaleza imposible de dominar.

La novela de Sidoro Villa allúgase nuna villa asturiana ficticia, Trubiana, qu’atropa trazos de distintes villes fluviales. Esti marcu funciona narrativamente como un auténticu microcosmos, permitiendo al autor presentar dellos tipos sociales: l’alcaldesa corrupta, el municipal que s’entiende con ella, el periodista pocu escrupulosu, la chigrera guapa y rescamplada, los guardies civiles que faen por adaptase al hábitat local, el mineru xubiláu –suegru del protagonista– que nun escuende la so rensía hacia’l Cuerpu, los xitanos de les viviendes sociales, los pelegrinos del Camín de Santiagu, los caminantes y pescadores que s’acerquen al ríu’l fin de selmana…

El protagonista, el teniente Corripio, ye ún más ente ellos. Les sos dotes pa la investigación criminal, que debe a les histories de Pepe Carvalho y Montalbano más qu’a la formación recibida, contrasten cola so afición a la sidra y colos celos que tien d’Arbesú, el teniente de la policía municipal. Sidoro Villa dibuxa un personaxe demasiao humanu pa ser un héroe, intelixente y tienru, pero tamién faltón y suxetu a debilidaes.

Cuando’l teniente Corripio tien qu’enfrentase a la muerte d’un méndigu y más tarde a la d’una pelegrina del Camín de Santiagu, ye’l primeru en rellacionar los socesos col accidente que, quince díes antes, dexara suelta una partida de cocodrilos qu’escaparan del camión que los tresportaba. Corripio va rindiéndose a la evidencia de qu’ún de los cocodrilos, ún enorme, de más de cuatro metros, pudo dir a parar al ríu. La sospecha comparte espaciu, nel so maxín, con otres posibilidaes, como ye l’acción de la mafia qu’opera na zona colos méndigos o la fuerza desatada de la naturaleza.

La figura del monstruu, al cabu, impónse a la imaxinación como un símbolu del mal qu’acecha les vides de los vecinos de Trubiana. Sidoro Villa muestra con maestría llingüística y fondura psicolóxica que’l mal y la llercia a les agresiones inesperaes non solo nun respeten a les comunidaes pequeñes, que se ven afectaes, igual que les grandes, por intereses de casta y acciones criminales, sinón qu’amás percíbense más escuros tovía cuando tienen de fondu’l marcu rellumante del paisaxe rural asturianu.

Cubierta del libro

Cubierta del libro

Pielgos de llercia

Sidoro Villa Costales 

Impronta, 113 páxines, 10 euros

Cola ayuda de la Conseyería de Cultura, Política Llingüística y Turismu del Principáu d’Asturies

Compartir el artículo

stats