Depués del parón editorial provocáu pola pandemia, nel mes d’abril d’esti añu espublizóse’l númberu 18 de la revista “Formientu”. Ye una buena noticia nun panorama que nun se caracteriza pola bayura de publicaciones periódiques n’asturianu y en gallego-asturianu y que carez d’un problema de discontinuidá na edición de les esistentes, sobre manera nel terrén lliterariu. De fechu, de les revistes de lliteratura qu’había en 2019 –“Campo de los Patos”, “Reciella Malory”, “Brixel”, “Trabatel”, “Formientu” y “Lliteratura”–, namás les tres últimes fueron recuperando’l pulsu, mentanto que la primera anunciara yá esi añu, por razones distintes, el cese de la publicación.
L’apaición de publicaciones dixitales como “Refuelgu” y l’apertura d’espacios pa la creación na prensa asturiana, anque son bienveníes, nun pueden compensar la falta de revistes lliteraries, que constituyen una vía imprescindible pa dar a conocer voces nueves y promocionar les yá consagraes. Pa dar cuerpu, en definitiva, a una lliteratura que tampoco acaba d’encontrar abellugu nes revistes en castellanu feches n’Asturies.
Nesti contestu, la publicación d’un númberu nuevu de “Formientu” ye tovía más estimable, como tamién lo ye’l dinamismu que demostraron los directores, Claudia Menéndez y Diego Solís, y l’editor, Inaciu Galán, al tresformar les tardes del enzarru sanitariu nun escenariu dixital onde se desarrolló #FormientuEnCasaFest, “un festival virtual que partía de la idea d’amosar cultura en ‘streaming’ pa que la xente pudiera esfrutala dende casa, dende Asturies y n’asturianu”.
Les collaboraciones d’esti númberu básense en material preparao p’algunes de les sesenta y dos actividaes que se ficieron nos dos meses que duró’l festival. Esta procedencia esplica la composición del índiz, onde, per primera vez, vese un dominiu del ensayu, que gana’l terrén que pierde la poesía. Na esbilla siguióse’l criteriu de selección vixente na revista, que pide una edá máxima de trenta años pa collaborar nella –d’aende lo de “Revista de lliteratura mui moza”–; esto ye, d’ente los eventos del festival, onde participaron persones de toles edaes, escoyéronse collaboraciones de xente mozo.
La revista, que ta ilustrada con unos dibuxos axeitaos y bien interesantes de David Pérez Busto, ábrese con un editorial, al que siguen cuatro rellatos firmaos por Xurde Menéndez Caravia, Natalia González, María Fernández Abril y Matthew Stuckwisch. Los nomes falen ente llinies de la entrada n’escena d’una xeneración nueva de narradores que posee una elevada formación académica y un compromisu inequívocu cola llingua asturiana, que combinen, na producción lliteraria y científica, cola castellana y cola inglesa. La presencia del estadounidense Matthew Stuckwisch afala a pensar nel interés que provoca l’asturianu fuera de les nuestres fronteres.
Na estaya dedicada al ensayu, participen Alba Carballo, Ástor Llaneza, Gonzalo Llamedo, Daniel Guerra, Aymara González, Diego Castañón, Nacho “Wings”, Eva Cameán, Blanca Fernández y de nuevo Matthew Stuckwisch. Esti apartáu destaca pola variedá temática: les cuestiones lliteraries y llingüístiques alternen con reflexones sobre música, bioloxía, pedagoxía y cultura pop –pente medies del ensayu de Blanca Fernández sobre’l ‘cosplay’.
La sección de poesía acércase más a los conteníos avezaos: poesía mui moza, escrita por Raúl Alonso y por Alma Hidalgo, que con 17 años ta desarrollando una actividá cultural sorprendente. La revista complétase con una entrevista a Marisa Valle Roso y un guion cinematográficu de Fernando de Luxán col qu’esti autor ganó’l I Concursu de Guion de Curtiometraxe Formientu, una iniciativa que surdió del #FormientuEnCasaFest.
Con esti númberu, Formientu pasa a ser algo más qu’una revista lliteraria: sin abandonar la función iniciática, señala un camín, una forma flexible y contemporánea de facer les coses, una ruta nueva de tener en cuenta pa la promoción de la cultura asturiana.
Cola ayuda de la Conseyería de Cultura, Política Llingüística y Turismu del Principáu d’Asturies
