A un pasu de la Navidá, ye un buen momentu pa facer un repasu a los llibros de lliteratura infantil y xuvenil publicaos n’asturianu nos últimos meses. Magar que’l númberu de publicaciones nun ye mui grande, compénsase cola calidá, visible yá n’años anteriores n’obres como l’álbum “Xosefa Xovellanos, La Esbelta. La dama ilustrada de les lletres asturianes” (Pintar-Pintar, 2020), de Vicente García Oliva, ilustráu por Ilemi Cuesta Mier, o l’álbum del mesmu autor “Páxines del diariu de Simón” (Pintar-Pintar, 2018), qu’incluye ilustraciones d’Inés Sánchez Nadal. Esti últimu quedó clasificáu pola revista CLIJ como ún de los diez meyores llibros infantiles publicaos n’España en 2019.
Autores y editores siguen les pautes afitaes por Gianni Rodari nos años setenta del sieglu XX, quien, na “Gramática de la fantasía”, dexó bien claro que les obres pa la reciella han de tar más cerca de “Pippi Langstrump” que de “Pinocchio”; esto ye, el propósitu educativu, cuando lu hai, tien que sometese al disfrute. Asina fizo él nel so maraviyosu “Tante storie per giocare”, que cuenta con una traducción al asturianu de Félix Ferreiro (“Munches hestories pa xugar”, Alfaguara, 1990).
Nesti primer artículu voi llimitame a falar d’obres escrites orixinalmente en llingua asturiana. Pa empezar, el llibru-discu d’Alicia Álvarez ilustráu por Alicia Varela “Kikirikikí” (La Fabriquina, 2020) ye un exemplu perfectu de lo dicho. Alicia Álvarez lleva unos años embarcada nel proyectu d’ofrecer material musical y lliterario a les families asturfalantes y al profesoráu de Llingua Asturiana. Si algo caracteriza a la so escritura son la orixinalidá y l’humor, lo que la convierte nuna autora especialmente dotada pa encarar con ésitu esti oxetivu colos presupuestos mentaos.
Arriendes d’esto, Pintar-Pintar acaba de sacar dos álbumes n’asturianu. Nel primeru, “Prau”, Daniel García Granda fai un homenaxe a la naturaleza nun estilu mui apropiáu pa iniciar a los más pequeños nel disfrute de la poesía. Nes sos páxines verdes, ilustraes por Ester Sánchez, socédense les enumeraciones d’elementos naturales, los xuegos fónicos, les imáxenes, les interpelaciones y les esclamaciones: “¡El prau presta, presta’l prau!”. Nun tien rimes, pero ye poesía pura.
El segundu, “Lin xube a Carabín”, ye una historia realista ilustrada por Iranidis Fundora onde l’autor, Aique Fernandi, retoma’l personaxe d’un álbum anterior, “Lin quier esnalar” (Pintar-Pintar, 2019). Nesta entrega, Lin xuega a ser un abixéu –“ún que-yos quita les vaques a los vaqueros”– en casa la güela. Ente llinies, reivindícase la llibertá qu’encuentren nos pueblos los rapacinos como Lin y el papel de los güelos y güeles nel so desarrollu afectivu.
Tamién Xurde Fernández repite personaxes na novelina “Ariel y Berta esquíen en Payares” (Trabe, 2021), cuarta entrega de la saga iniciada con “Ariel y Berta. Escursión al cabu Peñes” (Trabe, 2018). Les histories d’Ariel y Berta tienen trames sencielles, pero non por ello menos atrayentes pa los llectores preadolescentes. Ariel y Berta descubren sitios distintos, faen delles trastaes y aprenden a convivir. Nes noveles, plantéguense situaciones cotidianes qu’entretienen y dan que pensar, evitando tanto la moralina como’l tremendismu d’una parte de la lliteratura xuvenil d’anguaño. Los llibros cuenten coles ilustraciones de David G. Ferrero.
P’acabar, el rellatu ensayísticu “Piedra gris con rellumos doraos” (Epona, 2021), d’Helena Trexu, asítiase nuna llinia menos frecuentada na lliteratura xuvenil asturiana, tanto pola perspectiva feminista que sofita’l llibru como pol propósitu, que ye averar al públicu adolescente al conocimientu. La protagonista, Dobra, plantégase la misión de dar a conocer les principales muyeres compositores qu’hubo na Historia, como Fanny Mendelssohn o Alma Schindler, más conocida como Alma Mahler. Un llibru mui recomendable pa los amantes de la música y pa visibilizar nel ámbitu escolar l’actividá artística femenina.
Cola ayuda de la Conseyería de Cultura, Política Llingüística y Turismu del Principáu d’Asturies
