La lluz nidia del alborecer colábase polas rendixas de las contras de la ventana’l miou cuartu, chenas de rendixas ya acoronchadas. Al outru l.lau de la ventana, la zreizal mul.lar escucaba los mios sueños. Asomaba las canas como si fueran unos brazos grandísimos que deseaben abrazame fuerte. You saludábala tolos días ya sentía’l ruxe-ruxe de las fueyas que s’abanicaban adulces. La zreizal culpiaba al aire d’espertame de la mio l.loucura ya del sueñu ciegu que se durme na infancia ya na mocedá, Picaba colas canas nos cristales, ya mirábame con güeyos arremel.laos, cómpliz del mio deséu de saboriar aquel.las zreizas que chenaban d’almíbare la mia boca.
Yera primavera, las flores adornaban el paisaxe ya chenábanlu de color. De siguío, como si la Naturaleza pasara páxina, nun tris chegaba’l branu, ya con él el misteriu de los frutos. La zreizal cargábase de zreizas que maduraban pouco a pouco, ya volvíanse de roxu intensu. You xubíame na pica l’arbol ya maxinaba la imensidá del cosmos, maxinaba poder volar col raitán amigu col que compartía las zreizas del amor. Mirábame’l raitán, saltaba d’una cana pa outra, ya repartíamos aquel.los frutos que los dos saboriábamos con prestancia.
Nas tardes de branu, el raitán ya you dormíamos la siesta baxo la zreizal amorosa; cubiertos pol mantu de la solombra, suañábamos colas ventanas abiertas al mundu; un mundu ensin pechaduras, un mundu n’abertal. Sentíamos el verdor de la yerba, afalagaos polos rayos del sol que se colaban pente las canas. Muitas primaveras, muitos branos, muitos despertares ya muitos xuegos baxo la mul.lar.
Sicasí, el tiempu garróume de la mano ya l.levóume d’un l.lau pa outru. El tiempu alióse colas nubes ya entrenóuse pa pasar rápido, mui rápido. Abal.lóuse pa l.levame apriesa, ensin deixame mirar p’atrás. Enfoutéime no camín a percorrer, diba cola inercia de los días, por veces sobre chano, por veces en baxadas ya xubidas, las más xubiendo cuestas ya pericuetos, sortiando peneos, apartando los artos... El tiempu, ensin espera, empuxábame con afán ya fíxome siguir, siguir cola engañifa de que volvería en dalgún momentu a la mia casa a saboriar el dulzor de la zreizas mul.lares, que deixara al.lí, no l.lugar de partida. Una forma de viaxar pol camín ensin l.levar la cuenta de los días, los meses, los años, los versos, los sabores, los besos ya outros momentos vivos ya vivíos.
De sópitu, nesti esconsueñu, nun requeixu del mio maxín alcontréi al raitán, vieyu, mui vieyu, mui vieyu, el raitán eternu, el que cantaba al amor. El raitán falóume con voz muel.le:
–Secóuse la zreizal mul.lar, la del dulzor, la del amor. Nun da flores, nin zreizas, nin sueños. Yía l.leña seco que yá durme la pabana de la eternidá.
Miréime no espeyu de la l.luna ya vi, de repente, reflexáu’l tiempu. Estremecíme. ¡Outra vez el tiempu afalábame a siguir pola sienda de la vida!
–Atiendi, cuerre conmigo, cuerre, escaez, vive, suaña, Nun mires p’atrás, dame la mano ya sigui, sigui, sigui –insistíame.
Demientres esta velea, el raitán anióuse darréu no miou corazón ya los dos xuntos siguimos, señardosos, esqueirando nel pasáu, ya saboriamos outra vuelta las zreizas del amor.
