Suscríbete

La Nueva España

Contenido exclusivo para suscriptores digitales

con llingua propia

La fuercia de la sátira

El polifacéticu Xaime Martínez estrénase na novela con una obra corrosiva: “La fuercia o les cuatro epifaníes de Martín Feito. Una novela de vaqueiros”

Xaime Martínez (Uviéu, 1993) ye, seguramente, l’escritor más polifacéticu y orixinal de la escena lliteraria asturiana d’anguaño. En 2018 publicó’l discu-llibru “Ósculos d’agua nel imperiu asturianu”, un proyectu artísticu onde combinó música, poesía –nes lletres de los cantares– y narrativa –nel testu que les arropaba– pa crear un universu ficcional –l’Imperiu asturianu– que-y permitiera proyectar nel futuru la revisión histórica apócrifa de personaxes como Pelayu, Xosefa Xovellanos o Belarmino Tomás. El trabayu, qu’axuntaba les influencies de modelos lliterarios universales, del folk y del pop, y de la música tradicional asturiana, exhibía una llibertá creativa y una actitú irreverente poco frecuentes nestos llares. Esi mesmu añu espublizó tamién el poemariu en castellanu “Cuerpos perdidos en las morgues” (Ultramarinos), un llibru onde l’autor conxugó con maestría impropia de la edá l’irracionalismu, la parodia y l’humor irónicu. Darréu de consiguir con esta obra’l Premiu Nacional de Poesía Xoven “Miguel Hernández” en 2019, Xaime Martínez anunció la decisión d’usar n’esclusiva l’asturianu como llingua de creación artística.

“La fuercia o les cuatro epifaníes de Martín Feito. Una novela de vaqueiros” ye la so primer novela. El protagonista ye, según se diz nel paratestu del llibru, “un escritor neurasténicu” que decide retirase al llugar de Chaneces, un pueblu montés que vive d’una central térmica, en cata d’una inspiración que nun-y vien y que precisa pa cumplir con un compromisu editorial. Dende les primeres páxines sabemos que Martín ye un impostor qu’escuende la so incapacidá pa escribir o pa facer algo que valga imitando los rituales de la escritura.

Tien algo de Bartleby, sin llegar a tar tocáu pola desgracia: la etiqueta “neurasténicu” quita pesu a les sos andances y dexa’l campu llibre a la dulda sobre la veracidá de la so identidá como escritor y hasta sobre la realidá de los fechos que vive.

En Chaneces, el protagonista entra en contactu con una serie de vecinos que constituyen lo qu’él mesmu va denomar, más tarde, una “rede” d’intereses opuestos ante los que nun ye a tomar partíu. La tensión máxima desenvuélvese ente los guerrilleros que viven escondíos en monte, a los que Martín lleva llibros en secretu (?), y el guardia civil del pueblu, al que tol mundu se refier como “la Fuercia”. La historia desarróllase como la parodia d’un “western” qu’enllaza tamién colos mundos gauchescu (Martín Feito ye’l contrapuntu de Martín Fierro) y de los vaqueiros asturianos (una comunidá hermética que, na novela, homológase coles actitúes heroiques de los fugaos).

D’otra manera, el cabezaleru de los vaqueiros, Manulón de Porgüechu, personaxe inspiráu en Manolín el de Llorío, carez de “heterotopía ocular múltiple”, esto ye, como’l pastor Argos Panoptes, tien el cuerpu cubiertu de güeyos. “La fuercia” ye, en definitiva, una novela paródica y satírica, un xuegu lliterariu que, sin renunciar del too a tratar el tema identitariu, déxase llevar sin complexos pol impulsu lúdicu.

La obra da continuidá a dellos elementos y tendencies presentes en “Ósculos d’agua…”: empezando pel espaciu –l’Imperiu asturianu– y continuando col enclín pel eclecticismu lliterariu, que l’autor visibiliza acumulando referencies artístiques, y nesti casu tamién mitolóxiques. Siguiendo cola comparanza, na reconstrucción ficticia de los mitos históricos que facía l’autor en “Ósculos d’agua…”, l’Imperiu asturianu yera un espaciu lliteraturizáu, con cabida pa la épica y la fantasía –cómo escaecer la visión de Belarmino Tomás caminando perriba les agües del Nalón, como un mesíes obreru–; en “La fuercia”, en cambiu, acolúmbrense, a traviés del espeyu de la sátira, dellos trazos reconocibles d’apatía, fartonería y mediocridá espiritual que constituyen el reversu de sombra de la identidá asturiana.

El discursu de Xaime Martínez, nesti casu, tien una función corrosiva: la parálisis de Martín Feito y la pedantería cola qu’enmazcara la incapacidá pa vivir una vida auténtica apunten al oficiu de la escritura y, quién sabe, quiciabes tamién a una sociedá neurótica que mira y xulga pero tarrez sentise mirada polos milenta güeyos de Manulón de Porgüechu, l’últimu paisanu cabal.

La fuercia o les cuatro epifaníes de Martín Feito

Xaime Martínez Hoja de Lata 156 páxines

14,90 euros

Cola ayuda de la Conseyería de Cultura, Política Llingüística y Turismu del Principáu d’Asturies

Compartir el artículo

stats