Aínda más música

Nel añu 2019 l’Academia de la Llingua Asturiana publicó-y al músicu y académicu Carlos Rubiera’l llibru "En clave de lluna". Y nesti añu 2022 l’Academia publicó en Collecha asoleyada otru llibru de Rubiera que forma parexa col anterior: "Lluna d’abril". Dambos lleven partitures y en siendo llibros de cantu los dos amuestren les lletres de cada obra. Lletres que van en llingua asturiana. "Lluna d’abril" contién doce pieces corales compuestes y comentaes pol autor. Son habaneres de tema asturianu menos una entitulada "Cuando pienso". Esa ye de Giuseppe Verdi y, sí, ye’l "Va pensiero". "En clave de lluna" anuncia na portada lo que contién: 12 pieces clásiques de la ópera y el lied n’asturianu. Brahms, Schubert, Fauré, Bizet, Tosti, Bellini, Puccini y Verdi. Na páxina 5 vien l’índiz de les obres y convién parase na páxina 85, que-y correspuende a Giacomo Puccini con tres pieces de tres óperes suyes de les más conocíes: "Y llucíen les estrelles", "Nengún duerma" y "Ai, Mimí, tu yá nun tornes".

A too esto el 11 setiembre, fecha que suena muncho, estrenóse por fin la ópera de Luis Vázquez del Fresno que tresllada en música l’altu espíritu de la obra teatral "La dama del alba", d’ Alejandro Casona. Conque con eses blimes surde propiamente la primera ópera asturiana y ábrese la cuenta de les que vendrán. Prestóme de la ópera l’inxeniu d’aniciala en direuto poniendo en cambéu una obertura de la segunda parte. ¡Y qué obertura! Una na que’l autor desendolca poderíu d’orquestación y temes de música moderna urbana que contrasten irónicos col necesariu tonu míticu-rural de la obra. D’otra manera nun puedo dexar d’alcordame, en recuerdu tamién de Marisa Fanjul, de cuando Vázquez del Fresno presentó en casa d’ella fragmentos y vídeos que convencieron a la tertulia de que sí, de que diba llograse la obra.

Uviéu corría hacia San Mateo y el día 22, nel Teatru Filarmónica, presentó Carlos Rubiera la so "Lluna d’abril" en forma de conciertu. La Capilla Polifónica de Oviedo canció delles habaneres del llibru, como "Virxen de Guía", de tastu llaniscu, pero pieslló col verdianu "Cuando pienso" y bisólu. Mira tú: yeren les fiestes y a la puerte del cercanu Campoamor canciaba’l coru de la ópera y sentíase ellí, cuasi al tiempu, el "Va pensiero". El mesmu canciu del pueblu que pide auxiliu a los cielos. Solo que la versión de Rubiera paez un tanto menos bíblica y que la lletra entama asina: "Cuando pienso nel mio verde y guapu país". Ye verdá que’l "Va pensiero" vive espardíu pel mundu y qu’Italia siempres quier convertilu en himnu nacional. Bono sería tamién entós que se ficiere himnu coral de toa Europa, cola que ta cayendo.

El día 26 cellebróse l’actu institucional d’entrega de la Medalla d’Oru del Ayuntamientu a la Fundación Ópera de Oviedo. El nuestru alcalde y Juan Carlos Rodríguez-Ovejero protagonizaron una intelixente, prestosa y elegante ceremonia, onde la perfeuta música de Oviedo Filarmonía, dirixida por Lara Diloy, marcó los pasos y foi filu conductor. Al principiu oyéronse les acostumbraes bienveníes en castellán, inglés, y asturianu (naide rechistó). Y a lo últimu sintióse’l himnu d’Asturies seriu qu’atronaba. Cómo non si a la xente en pié xuniéronse les señeres voces de la soprano Beatriz Díaz y del tenor Alejandro Roy. Quiciavís esti ambiente yera nel que suañaba Carlos Rubiera en 2019 cuando escribió, "En clave de lluna": "¿Por qué nun va poder facese ópera n’asturianu nel Teatru Campoamor"? El futuru dirá qué pasa con eso.

Suscríbete para seguir leyendo