con llingua propia

Historia d’una obsesión

José Luis Rendueles esquiza na figura del políticu y escritor Jesús Ibáñez y de la so madre en "La llibertá los caminos", una novela a dos voces

Marta Mori

"La llibertá los caminos" ye la historia d’una obsesión: la que lleva al autor, José Luis Rendueles, a persiguir per archivos y biblioteques noticies, de mano, sobre’l sindicalista, políticu, periodista y escritor Jesús Ibáñez y depués sobre la madre, Celedonia Rodríguez (Doña), que, depués d’un tiempu d’investigación, foi alzándose hasta algamar la estatura del fíu como carácter novelescu. Ye de suponer que l’orixe d’esti pruyimientu tuvo que ver cola llectura de les memories d’Ibáñez, "Discos de acero: Memorias de mi cadáver (novela encajada)", que se publicaron en México en 1946, país onde tuvo exiliáu dende 1942 hasta la so muerte en 1948.

El llibru, que ta escritu al filu camudable de la memoria, invita más a pensar nel protagonista d’una novela picaresca –Ibáñez nació por accidente nel penal de Santoña, onde la madre taba visitando al afiáu, un bandoleru d’Urbiés, y pasó la infancia pelos caminos y pidiendo col padre– que nel home que representó en Moscú primero a la CNT, en 1922, y más tarde al PCE, en 1925, na Internacional Comunista, o nel que sustituyó a González Peña como comisariu xeneral del exércitu del norte en 1937. Nin el calter fragmentariu de les memories nin la dificultá d’abrise pasu ente los testimonios de los munchos adversarios qu’Ibáñez foi collechando según diba cambiando de partíu -pasó peles Xuventíes Socialistes, la CNT, el PCE y el PSOE- debieron facilitar al novelista la reconstrucción de la vida d’un home que combinaba como nengún les condiciones d’héroe y antihéroe.

La novela que finalmente nos presenta José Luis Rendueles, coincidiendo cola publicación de "Flora" (Trabe, 2022) de Faustino Álvarez, que xira tamién alredor de la madre de Jesús Ibáñez, ye un trabayu a dos voces: tenemos, d’un llau, un narrador escritor –una ficcionalización parcial del autor– qu’evoca la vida vivida cola muyer y, según-y va lleendo’l testu de la novela, da-y el parte de les torgues y crítiques qu’encontró nel so facer artísticu; al par, envueltu nesti marcu de resonancies cervantines, ta’l rellatu de la vida de Doña y de Jesús Ibáñez.

El procedimientu ta más al serviciu de l’amenidá que del llogru d’una verosimilitú que sal sola de manera natural de resultes del realismu de la narración y del rigor de les fontes. Moderniza’l testu central, que, gracies a esta vistimienta, fai olvidar l’aspectu de crónica que gasta en dellos momentos, y proporciona a la obra una estructura más flexible, con cabida pa la digresión murnia o escéptica, evitando los xuicios morales que suelen esmucise nes narraciones históriques. D’otra manera, la historia del escritor que nun ye a rematar una historia ye en sí una historia. La inconstancia, la falta de xacíu, l’hedonismu facilón, la necesidá, en suma, d’olvidar les comeniencies de la vida y el so final inevitable valen tanto pa esplicar l’abandonu de la empresa artística como pa pidir perdón a una muyer que nun recibió l’atención que merecía. El narrador escritor preséntase d’esta forma como un ser falible pero en procesu de busca, fallíu pero consciente de los propios fallos, afanáu en da-y sentíu a una vida que, a diferencia del rellatu sobre Ibáñez y la madre, onde los datos empíricos clausuren la significación y dacuando amenacen con afogar la llibertá de la escritura, tovía pue ser redimida si se consigue da-y sentíu.

Ye esta busca de sentíu precisamente lo que fai de ponte ente la narración marcu y el rellatu de la vida d’Ibáñez. Dambes figures aseméyense en más d’un puntu: el cultu al sexu, que nel narrador contemporaneu degrádase al facer d’él un consumidor de prostitución; la rebeldía, reprimida nel últimu, desatada n’Ibáñez, y la insatisfacción política, que los convierte en seres en guerra col so tiempu. Y delantre d’ello, una figura inasible, la de la madre d’Ibáñez –que quedó inmortalizada en La Lloca’l Rinconín–, que representa la llibertá pura, el deséu sin frenu, l’olvidu del suxetu actuante delantre la presencia absoluta y salvadora de la mar.

la lliberta los caminos

la lliberta los caminos

La llibertá los caminos

José Luis Rendueles 

Trabe, 244 páxines, 14,25 euros

Cola ayuda de la Conseyería de Cultura, Política Llingüística y Turismu del Principáu d’Asturies

Suscríbete para seguir leyendo