Cuatro gatos nun son poco

L’anovación formal que se produxo nes lliteratures hispániques nel cambiu de sieglu sofitóse, a lo menos, en trés rasgos distintivos: la suxetividá, que llexitimó la escritura autobiográfica, el frayamientu, que permitió abrir l’espaciu narrativu a los elementos poéticu y filosóficu, y la condensación, el trazu que, pa la mio idea, estrema de manera más nidia la lliteratura nueva de la llamada lliteratura de xéneru. Depués del espoxigue esperimentáu pol microrrellatu y pol haiku, na última década l’enclín pola condensación dio pasu a un interés creciente polos aforismos, un tipu d’escritura que casa enforma coles condiciones impuestes por redes sociales como Twitter.

N’Asturies, la escritura d’aforismos ta viviendo un esplendor especial, qu’atestigüen la esistencia d’una colección específica dientro de la editorial Trea y el númberu d’autores asturianos de patria o adopción –José Luis García Martín, Antonio Merayo, Azahara Alcorta, Estefanía González, Alejandro Céspedes…– que s’acercaron a esti xéneru. A diferencia de lo qu’asocede con otres llingües peninsulares, como’l gallegu, el catalán y el vascu, esti tipu de lliteratura nun tien apenes representantes n’asturianu, quitando les olivines de Vicente García Oliva, que suelen tener un componente humorísticu. Ye por eso polo que Ramón González, el prologuista de "Cuatro gatos", califica esta publicación de "esploración y puesta a prueba". Una esploración más que llograda, si nos atenemos a los resultaos, que supera con muncho la finalidá de demostrar que "l’aforismu n’asturianu ye posible".

Los cuatro autores que participen nesta obra billingüe asturianu-castellanu –José Luis Argüelles, Jordi Doce, César Iglesias y Fernando Menéndez– tienen una trayectoria bien afitada como poetes en llingua castellana con estilos bastante distintos. Como aforistes, sin embargu, ye posible encontrar un asemeyu ente ellos tanto nos temes trataos –la entidá del yo, el pasu del tiempu, la naturaleza de la política y el arte, la muerte…– como na perspectiva adoptada, que bancia ente l’escepticismu y la desilusión.

De los cuatro, José Luis Argüelles ye’l qu’exhibe en mayor midida la condición de poeta. Algunos aforismos suyos suenen a versu, pol ritmu de les palabres –"La vieyera apréndenos a amar l’imprevistu sol de los iviernos"– o pol papel desempeñáu pola imaxe –"Mañanes aborrinaes xunto al mar"–. Conozse néllos la voz habitual de la so poesía: escéptica, dada a la ironía y especialmente crítica cola vanidá y la banalidá de l’actividá artística –"Les fames póstumes y los sos cadabres indiferentes"–. Como los demás autores, davezu recurre tamién a la intertestualidá, en rellación con refranes o obres lliteraries –"¿Qué ye l’horror sinón la constatación de que’l monstru sigue con nós?"–.

Los aforismos de Jordi Doce son, na mayor parte de los casos, declaraciones con vocación de máxima, anque’l sentíu dacuando queda abiertu a l’interpretación –"Un animal prehistóricu na so llamarga: la llingua"–. Domina la escritura introspectiva –"¿Y la insatisfaición pol deber cumplíu?"– o satírica –"Nun pasa un día ensin triyar el charcu de sí mesmu"–. Igual qu’Argüelles, davezu apóyase en refranes o frases feches –"Fálta-y propósitu, pero tien sentíu"–, anque tamién afonda nel espesor de la palabra poética –"Les manes agüecaes, pa recoyer l’aliendu de los caballos al alborecer"–.

D’otra manera, los aforismos de César Iglesias destaquen pola bayura léxica en llingua asturiana y pola plasticidá, anque nun renuncia a los xuegos fónicos –"Esnala l’estornín y estorna’l día"–. Les alusiones mitolóxiques combínense, nesti autor, con representaciones inequívocamente asturianes: "Cai l’orpín y el mofu fai l’almuhada del paisaxe".

P’acabar, Fernando Menéndez lleva al estremu la condensación. Los aforismos d’él suelen ser enunciaos enunciativos qu’ocupen una llinia, unes veces afirmativos –"La honestidá ye una tentación"– y en bien de casos, negativos –"La felicidá nunca nun tien hestoria"–. Les declaraciones, les más de les veces dotaes de conteníu filosóficu, algamen la perfección formal cuando tán escrites en castellanu –"Todo es fragmento hasta la muerte" frente a "Too ye un retayu de daqué, hasta’l morrer"–. De fechu, ún de los munchos méritos d’esti llibru ye qu’ofrez la posibilidá d’escoyer idioma. Y cada idioma, pa dicir lo mesmo, diz coses distintes.

Suscríbete para seguir leyendo