Campu de sema y campu de batalla

Cuando, a finales de los años ochenta del sieglu pasáu, se produz l’espoxigue de la poesía n’asturianu, faise sobre una negación de lo político qu’afecta tanto al conteníu como a la intención de les composiciones. La poesía del Resurdimientu, acordies con Xuan Xosé Sánchez Vicente, asítiase "na rodiada del yo"; en contraposición a les aportaciones más tempranes –Manuel Asur, el propiu Sánchez Vicente–, renuncia a la representación colectiva y a la finalidá política esplícita, que sustituye temporalmente pol intimismu y les referencies urbanes y artístiques.

Mediando ente estes dos postures, álzase, en 1996, na III Xunta d’Escritores Asturianos, la voz de Ramón Lluís Bande, quien, a la vez que sorraya les diferencies cola xeneración anterior –la ponencia titulábase "Relevu xeneracional"– reivindica "la militancia llingüística" de los escritores de la dómina, una dimensión política de la escritura que, nel casu d’él, axuntábase al tratamientu de temes como la reconversión industrial o les buelgues de la Guerra civil.

La obra lliteraria d’esti autor, que ta recopilada en castellán nel volume "Las habitaciones vacías", ye tamién política dende lo primero nel sentíu que la crítica-y da anguaño al términu: les vivencies personales sofiten, de manera implícita pero bien visible, la reivindicación d’una identidá nacional y de clase. Les películes que dirixe, sobre manera les documentales –"Estratexa" (2003), "De la Fuente" (2004), "El paisanu" (2005), "Equí y n’otru tiempu" (2014), "El nome de los árboles (2015), "Cantares d’una revolución" (2018), "Vaca mugiendo entre ruinas" (2020), "Retaguardia" (2022)…– xiren alredor de la historia reciente. Al traviés d’elles y de los cuadernos de cineasta que suelen socedeles, va construyendo un rellatu que sorraya’l calter revolucionariu de la clase trabayadora asturiana –onde incluye tamién a los agricultores y a los ganaderos– y la esistencia d’una conciencia nacional, que fundamenta en fechos como la constitución del Conseyu Soberanu d’Asturies y Lleón.

Estes idees alimenten la poesía d’"El paisaxe belixerante" (2023). El llibru surde como una derivación del rodaxe de "Retaguardia" (2022), una película esperimental enmarcada na cultura "verbatim" onde Bande, basándose en semeyes de Constantino Suárez, testos del diariu "Avance" y dibuxos de Goico Aguirre y Germán Horacio, fai una hipotética película de propaganda bélica al estilu soviéticu. N’"El paisaxe belixerante", que tien como modelu’l poemariu "Holocausto" (1975) de Charles Reznikoff, l’autor "recicla" les cróniques de guerra publicaes por Juan Antonio Cabezas nel periódicu "Avance" en 1937 col envís de crear un productu artísticu orixinal.

"El paisaxe belixerante" ye’l resultáu d’un trabayu de busca, selección, traducción y montaxe de delles cróniques de Cabezas referíes al territoriu asturianu nun momentu en qu’esti se convirtiera nun escenariu bélicu: "Los aviones fascistes cansaos de dar vueltes a les peñes dexaron cayer les bombes so’l pueblu". El llibru tien un tonu épicu –"morrieron pa dende la muerte / seguir glayando pola llibertá"– que, sin embargu, elude los escesos retóricos de la prosa propagandística de la época. El procesu de selección y montaxe dan-y una contención y una distancia estética bien necesaries pa tratar esti tipu de conteníos.

La resistencia asturiana a les tropes nacionalistes preséntase como un actu revolucionariu –"Les campanes cayeron de los tallos de piedra / sescudíes pol airón de la revolución"– con precedentes n’Ochobre del 34 –"Puñu n’alto los homes / como nel ochobre heroicu…– y n’otres revueltes anteriores –"Ye un pueblu que nun pudo abatir / el poderíu de la otra Roma"–. La redacción del "Avance" tenía una idea clara sobre la continuidá histórica d’Asturies no defensivo, que taba mui presente na conciencia colectiva –"El romance de xesta vuelve ser / llucha heroica contra moros invasores"–. A partir d’ella, conformen un discursu propagandísticu que’l poeta fai suyu no que tien de reivindicación identitaria.

La segunda exa del poemariu ye’l protagonismu que s’otorga a la tierra, nes dimensiones telúrica y territorial. Asturies habita un "paisaxe" regáu pol sangre: "Campu de sema y campu de batalla". Ye, tanto na fonte periodística como nel productu poéticu final, l’hábitat d’una estirpe "obrera y campesina" y d’una nación milenaria "qu’alienda y llucha".

Suscríbete para seguir leyendo