Tres poemes de Xuan Xosé Sánchez Vicente pol Día de les Lletres Asturianes

WONDERFUL CARBAYU (Poema a tres manes)

Pa que tu teas equí, verde, enormemente verde la to garamuta,

volando tantu aire como si tu mesmu fueres l’aire;

pa que’l to tueru enllene, poderosu, la vista, dende’l pie hasta les quimes,

equí, al pie de les cases, al pie de l’acera, al pie d’esta carretera

peronde pasen miles de milentes de coches cada día,

y tu nun resistas solamente, sinón qu’espoxigues un migayín más a cada añu

y estele’l paseante col to verde trupu de fueyes como llances de nueve redondos dientes;

pa ello tuvieren que pasar munchos propietarios, foles y foles d’heriedes y más heriedes

que fueren tresmitiendo les finques en sucesión de sieglos, y, dempués, daquién que te llantó un día;

y, tresacá, de recién casi, corporaciones municipales, y nuevos propietarios,

urbanistes, parceladores y dalgún que decidiere un día conservate

como muestra d’aquel Xixón que yera nada más un puñaín de cases atropaes ente la playa y el cai,

y, fuera d’esi puñaín, caseríes y praos, onde vagaben les vaques, pastiaba la reciella,

la yerba espoxigaba pa ser herba un día en tenaes y facines

y el maíz panoyaba pa ser fariña de boroña o tortu.

Sieglos y sieglos y paisanos y ñeños y muyeres patiando esi terrén y poseyéndolu,

y tu, dende que fuiste biltu, años tres años, creciendo, espolletando, resistiendo les plagues

y les seques,

la tentación de dalgún de baltate pa lleña y facer de ti lliños, colondres, trabes o estielles

de dalguna mísera foguera al borde del camín;

y, sobre too, la cabera, la más poderosa,

facer del to suelu un pedacín más d’espaciu llibre pa llevantar más cases o pa espurrir

l’alfombra de l’acera.

Déxame agora, carbayu, cabellera españada n’aire verde, xótigu pegollu de madera al cielu,

anotar na mio cartera la gracia la to imaxen, la memoria la to vida

y d’esa historia

milagrosa

qu’aporta a mi vistida de vida y de verdor viviegu. (02/12/2022)

GUAPURA

Agora, colos años, yá sabes de verdá ónde añera la guapura,

Cuálu ye’l fondu terrén onde s’anicia y bilta:

La belleza nun ta nel color de los güeyos, na proporción del cuerpu, los rasgos de la cara, el volume del pelu, la llinia de la boca…

Efímeres guapures toes, fueyes y caños del tueru verdaderu:

La guapura desurde, bilta y espoxiga de la mocedá: la ñidiura –blanca o escura– de la piel, la mirada aliella de los güeyos, la petecible tiez del rostru, la tenrura firme de la boca, el so roxu acapiar,

El caminar llixeru de los cuerpos, el so cimblar moviendo l’aire al desplazase, el redondu clamiar de les mamielles, el curvu besu de llabiu del cadril…

Nun son más qu’eso: la tenrura los años manifestada en carne: ñidia, vibrante, alíxera, llixera, ensin mácula dala pol cansanciu o pol tiempu.

Y dempués, colos años, les belleces restantes –esi mirar entá viviegu, esa guapura alada qu’entovía nel pechu resiste al pasu de los tiempos, acasu esa cintura que ruempe dempués n’hinchada fola hacia la curva de la pierna– son restos nada más,

Farrapos que caminen, antaindiegamente, pasu ente pasu, según la fortuna les persones o los años, hacia la so definitiva falta d’entropía, hacia la so ruina y fin.

Agora, colos años, conoces yá’l significáu terrible, afarante, del versu d’Aleixandre, "saber es haber vivido".

Masque quizás entá nun te llegare l’españíu total de la sentencia, gayola y pavor: entá te queden coses por "saber", coses que tas por ver llegar a les murueques de la so roína enantes

del saber d’elles total, de la so y de la to estinción definitiva. (05/03/2019, 10 de la mañana)

MADRE

Vuelvo vete munches vegaes, madre,

col maxín, sí, y tamién en persona:

véote nos funerales, neses muyeres

que, como tu, arrastren pal altar,

cuando aporta la hora comulgar,

el so cuerpu menudu, el so cayáu,

les sos manches na cara y el so pelu

menguáu, la tiez perseca y, nos güeyos,

la decisión de dir alantre masque cueste.

O pelos parques o aceres, soles

o con gabita del fíu o de la nieta:

pasu ente pasu, col solu avagu

de reponer el fuelgu del aire

nel pulmón o la sangre pela pierna.

Véote ehí y al vete vuelvo vete

na cama l’hospital, yá nes caberes

hores dempués d’un llargu sufrimientu.

Nuna agonía na que nun podíes

falar, masque intentabes espresar

daqué cosa, desesperadamente,

con güeyos y cabeza, y solo un vierbu

fuiste p’articular o pa entendelu

nós: fíos, dixiste, fíos quiero…

Y nada más pudiste yá falar,

por más que lo intentases colos güeyos

y la tiesta movida en desesperu

por nun ser pa dicir lo que queríes.

Y yo entrúgome, madre, pol silenciu,

pol roídu detrás d’aquel silenciu,

polos tos pensamientos en silenciu.

Acasu facíes balance la to vida:

si pagara la pena tantu esfuerzu,

tantos años gastaos nel to maríu,

tantos, tantos, al cuidu los tos fiyos,

por llevalos alantre, por upalos

un migayín enriba de ú salieren.

Con tantes allegríes, sí, con tantos

mieos, con dalgunos fracasos, dellos

tarrecimientos y surtíos. Siempre

recontando les escases monedes,

les cantidaes xustes pal vistíu,

los llibros y la escuela y el decoru

–arrataos mes tres mes naquella casa

los atuñonos dioses la moneda–.

Y yo, agora, madre, entrúgome

si andabes pescudando la más gafa

entruga: el balance, naquella hora final,

de la to nuestra vida: si pagara la pena

el duelgu, el sacrificiu, los esfuerzos,

la entrega tan total a la familia,

y si nós devolviéramos dalgún

de los talentos que nos apurriste

con manuda bayura y con esfuerzu;

si atuñamos con ellos, faciéndolos

roina simienta que malapenes grana,

o xenerosos fuimos devolviendo

l’amor y l’atención que regalaste.

Y nun sé, madre, cuálu fue’l balance

que facíes: si tantu amor y duelgu,

devueltu, fue manudu o en migayes

escases; si pagara la pena

pa unos pocos talentos daos empara

tantu amor malgastáu y tantes penes.

(23/10/19)

Suscríbete para seguir leyendo