Cómic en clave de serie

La historia de los premios "Alfonso Iglesias" de cómic n’asturianu defínese pol predominiu del realismu y de los xéneros biográficu y documental. Ye’l casu de los álbumes autobiográficos "Manzajú" (2010) y "Seltegu" (2022) de Ruma Barbero; del diariu visual "Cuadernos d’Ítaca" (2014) d’Alfonso Zapico; de noveles gráfiques de corte esistencial como "L’arume de la tierra" (2015) d’Enrique Carballeira o "Paez que nun foi ayeri" (2022) d’Ángel de la Calle, o de biografíes como "Cacique blancu" (2019) d’Ánxelu González, "El sol na escombrera" (2021) d’Alberto Vázquez García y "Ana María, la llobera d’Asturies" (2023) de Guillermo Menéndez Quirós.

La llista de gallardonaos, que por desgracia tovía nun recueye nengún nome de muyer, incluye tamién adaptaciones lliteraries, como la que fizo Isaac del Rivero de la novela "Doña Berta" de Leopoldo Alas "Clarín", obres didáctiques, como l’álbum "Homes" (2013) de Javier Antonio Marinas, qu’esplica, baxo esti títulu tan poco inclusivu, la evolución de la especie humana, y delles noveles gráfiques de conteníu históricu, como "Indianu" (2017) de Luis Navazo, "Los llazos coloraos" (2018) d’Alberto Vázquez y "El viaxe a la lluz" (2016) de Ruma Barbero.

Esta sorprendente uniformidá nel siguimientu de la estética realista rompióse en 2023, al decidir el xuráu conceder el premiu a un álbum de ficción "pa tolos públicos", "Misteriu nel soterrañu", de Xon de la Campa, que firma como Gurriapu. "Misteriu nel soterrañu" ye un álbum de llinia clara con influencies nidies del Tintín d’Hergé, del dúu "Blake y Mortimer" de Jacobs y del Astérix d’Uderzo y Goscinny, pero tamién de fontes lliteraries como les noveles de Jules Verne y el personaxe Hércules Poirot d’Agatha Christie. La obra preséntase como la primer entrega d’una serie futura: "Les aventures del comisariu Hevia", un personaxe francés de padre asturianu qu’investiga, con cierta "nonchalance" mui propia de la novela de detectives, los delitos que se cometen, a principios del sieglu XX, nel sestu distritu parisín.

Nesti volume, Yves Hevia tien qu’investigar una serie de crímenes asocedíos nel acabante d’inaugurar tren metropolitanu de París. Na trama, mécense con bastante flexibilidá no que fai a les cronoloxíes elementos y personaxes históricos como l’alcalde Jules Ferry y l’inxenieru bretón Fulgence Bienvenüe cola épica anglosaxona del "Beowulf" y la mitoloxía nórdica. L’álbum ufierta una llectura fácil y entretenida, na llinia de trabayos anteriores de Xon de la Campa, como’l xuegu de rol "Depués d’ochobre" (2020), del que ye coautor xunta Nicolás Bardio, y la novela "La bastarda de Pelayu" (2023).

La obra ofrez otros aspectos interesantes, como la reproducción d’elementos arquitectónicos parisinos: la Casa’l Conceyu de París, la Estación del Norte, dellos edificios d’estilu Haussmann, delles boques de metro "art nouveau" diseñaes pol arquitectu Hector Guimard –incluyendo la de Bastille, que valtaron en 1962–, la Ponte de Mirabeau, obra del inxenieru Paul Rabel, que tien vistes a la Estatua de la Llibertá gala y a la Torre Eiffel… Al pie d’ellos, Gurriapu dibuxa edificios asturianos coetáneos, como la Casa da Pértiga de Doiras (Bual) y el proyectu orixinal de la Casa Tamanaco de L’Infiestu, obra del arquitectu moscón Emilio Fernández Peña. L’autor xuega a inxertar elementos asturianos nel París de 1900, como un mou de dexar patente l’orixe de la so creación.

Destaca, tamién, el procuru que pon nel dibuxu de les viñetes onde se cuenta la historia del rei inglés Hrothgar, qu’imiten les pintures medievales. Acordies cola lleenda, Hrothgar mandó construyir un castiellu fabulosu, Heorot, nuna islla habitada pol espíritu d’un cuélebre. L’inxertu d’esti animal mitolóxicu casa cola intención de Xon de la Campa y otros autores pertenecientes al grupu autodefiníu como "L’Espardimientu" de crear un imaxinariu fantásticu de raigañu asturianu basándose na mitoloxía autóctona. Esti propósitu enllaza col proyectu de promocionar la producción de creaciones de fantasía n’asturianu y d’histories, como "Misteriu nel soterrañu", que dexen una puerta abierta a lo irracional. Un proyectu que nesti álbum en particular dexa con ganes de lleer más.

Suscríbete para seguir leyendo