Alfonso Guerra, na so campaña editorial contra Sánchez y el nuevu PSOE, pasó'l miércoles per Uviéu. El Club Prensa Asturiana [en un acto organizado por la Librería Cervantes] taba de bote en bote. Hai munchu cesante nel socialismu y nel sindicalismu afín d'esta tierra. Les semeyes del actu son un documentu históricu, una orla de xubilación.
Nun se resigna Guerra al segundu planu, ye lo que tien ser machu alfa, los instintos nun caduquen. Asina que vieno a da-yos a escoyer, a los sos herederos malqueríos, ente l'apocalipsis o la sumisión. Defendió'l patriotismu pero axustáu a les llendes xeográfiques qu'a él-y abulten les úniques merecedores del amor de la izquierda, y nesi mapa del sentimientu coincide con Santiago Abascal. Choca sentir a un vieyu socialista al que oímos, tantes veces, predicar la clase apelando agora a la nación.
Una perla de Guerra del mesmu día, na radio: lo de José Ángel Fernández Villa igual nun yera delitu sinon enfermedá mental: "¿Era un síndrome de Diógenes? Tener tanto dinero guardado y vivir tan pobremente..." Abriónos los güeyos l'antiguu vicepresidente y condolémonos con él. ¡Infeliz de Villa! ¡Benditu de Dios! ¡Con tolo que tenía pa con él, el mal del cartoneru consumiéndolu, y la sociedá xúzgalu! ¡Mira que somos cabrones!
Javier Fernández actuó de presentador de Guerra y dixo que, cuando la transición, tol mundu renunció a algo (la República, el marxismu, el Movimientu Nacional...) menos los nacionalistes, que siguieron añerando, nos cuévanos escuros de la intimidá conspiratoria, les ansies d'independencia. Bueno: eso llámase llealtá a unes idees. Ya sabemos que'l PSOE nun la practicó siempre na mesma medida pero nun ye razón bastante pa denigrala notros. Y tampoco fue tal como lo cuenta Fernández. Jordi Pujol caltúvose fiel a España: ehí tienes un amigu de la patria común. Pero los actuales dirixentes del nacionalismu catalán, obsesión del protoexpresidente astur, nun tán traicionando ningún pactu porque nun lu firmaron. Puigdemont, coetáneu d'un servidor, nació en 1962 y, por razones d'edá, nun votó l'actual Constitución. Quim Torra tamién ye del 62. Jordi Sánchez, del 64. Joaquim Forn, del 64. Josep Rull, del 68. Junqueras, del 69. Romeva, del 71. Jordi Cuixart, del 75... Serán más o menos tosquinos, tramposos tocante a la interpretación de reglamentos y, seguro, la espoleta del despertar de la estrema derecha n'España pero'l compromisu pa col so electoráu nun se-yos puede negar. Igual eso ye lo que más-yos molesta a Fernández o a Guerra: que cumplieron lo prometío nun tiempu nel que nun esistía'l vezu.
Y el perru de l'alcaldesa de Ponga, del PSOE (ella), mandó pal hospital al alcalde de Llanera, tamién del PSOE. Nada sabemos de les razones de Yaqui porque ningún de los tres involucraos nel sucesu fai declaraciones. Podemos afirmar, namás, que los bocaos quedaron pa en casa, dientro'l partíu. Pues otro tanto.
miliorodriguezcueto.wordpress.com
