14 de mayo de 2019
14.05.2019

La XL Selmana de les Lletres Asturianes, tou un ésitu

Los actos d'esta edición dedicáronse a la música asturiana, fecha n'asturianu o en gallego-asturianu, de los últimos 40 años

13.05.2019 | 20:10

Anguaño celebróse la 40 Selmana de les Lletres Asturianes, que nesta edición dedicóse a la música asturiana, fecha n'asturianu o en gallego-asturianu, de los últimos 40 años.

La Conseyería d'Educación y Cultura considera que'l llabor del mundu de la música que nos postreros 40 años vien usando estes llingües como vehículu de comunicación nes sos creaciones y composiciones artístiques ye un fechu que tenemos que destacar y valorar. Cantar nes llingües propies d'Asturies en tolos xéneros musicales fai visible y dignifica esi patrimoniu cultural, amás d'exercer d'axente normalizador de primer orde. Por estes y otres razones asemeyaes, la Conseyería d'Educación y Cultura del Principáu d'Asturies decidió dedicar esta XL Selmana de les Lletres Asturianes a la música n'asturianu.

Los actos y actividaes programaos pa celebrar esta 40 edición de la Selmana de les Lletres tuvieron como protagonistes, en munches ocasiones y como ye costume, a los centros y l'alumnáu que cursa l'asignatura tanto d'asturianu como del gallego-asturianu.

El llunes día 29 d'abril, nel Teatru Auditoriu de La Pola Siero, celebróse la Gala de presentación del CD "El mio cantar", un conciertu con cantares ganadores del premiu escolar del mesmu nome. Esta iniciativa de los Servicios de Normalización Llingüística, que cuntó cola collaboración na xestión alministrativa y económica de la Conseyería d'Educación, consistió n'entamar un concursu de creación musical ente l'alumnáu de Llingua Asturiana de los centros pertenecientes al ámbitu territorial de los servicios implicaos na organización de l'actividá. Los cantares ganadores grabáronlos grupos asturianos conocíos y editáronse nun CD. Nesta primer edición del premiu, los centros ganadores fueron el CP Carbayín Bajo, de Siero; l'IES Víctor García de la Concha, de Villaviciosa; CRA Río Cibea, de Cangas del Narcea; CP José de Calasanz, de Llanera; CRA San Martín, de Samartín del Rei Aurelio; CRA Lena, CP Elena Sánchez Tamargo de Llaviana; CP Jesús Neira, de Llena; CP El Cotayo, de Siero, y l'IES Peñamayor, de Nava.

El martes 30 d'abril, como vien siendo vezu nos últimos años, la Xunta Xeneral del Principáu d'Asturies entamó, en collaboración cola Conseyería d'Educación, una llectura de testos n'asturianu y gallego-asturianu. Nella participaron personalidaes de la política asturiana y alumnáu del CP Fozaneldi y del CP Carmen Ruiz Tilve. Primero del actu de llectura, l'alumnáu d'estos centros disfrutó d'una visita guiada peles estancies de la Xunta Xeneral.

Na capiella de los Dolores de Grau celebróse, esi mesmu día, a les 19.30 hores, l'actu d'entrega de diplomes del VI Premiu de Poesía Selmana de les Lletres p'alumnáu de Primaria y Secundaria del Conceyu de Grau, con una actuación musical de Toli Morilla. Esti premiu qu'entama la Fundación Aula de les Metáfores en collaboración cola Conseyería d'Educación premia los meyores poemes de los alumnos y alumnes de los centros d'esi conceyu que participen nel concursu, que ya va pela sesta edición.

El xueves 2 de mayu a les 18.00 hores, el Teatru Palacio Valdés acoyó pela primer vez la gala d'entrega de premios del VI Certame de Teatru Escolar en Llingua Asturiana y Gallego-Asturianu. Anguaño la obra "Una xornada de llocura nel colexu", del CP El Bosquín, de L'Entregu, resultó ganadora na categoría d'Educación Primaria. Na categoría d'Educación Secundaria'l primer premiu foi pa la versión n'asturianu de "Yerma", del IES César Rodríguez, de Grau. Na gala representáronse les dos obres ganadores, asina como los monólogos presentaos al certame y diéronse los demás premios en dambes categoríes: segundu y tercer premiu a la meyor obra, meyor actor y actriz, meyor testu orixinal, meyor dirección, meyor escenografía y meyor vestuariu.

L'actu escolar institucional de celebración de la 40 Selmana de les Lletres celebróse nesta ocasión nel CP Lorenzo Novo Mier d'Uviéu, el vienres 3 de mayu. El conseyeru d'Educación y l'alcalde d'Uviéu dixeron unes palabres al munchu públicu qu'asistió a la entrega de premios, ente los que s'atopaben families, profesoráu y l'alumnáu ganador del XXIV Certame de Creación Artística/Lliteraria, del XVI Certame de Cartelismu y del VII Certame de Creación Audiovisual. La participación del alumnáu nos certámenes convocaos pa esta edición de la Selmana de les Lletres foi la más numberosa de los últimos años: 150 centros y más de 3.000 alumnos y alumnes presentaron los sos trabayos n'asturianu y gallego-asturianu, faciendo bien difícil la xera del xuráu pa escoyer les persones ganadores en cada categoría.

L'actu presentólu la directora y alumnáu del centru y nél el públicu asistente pudo disfrutar d'una pieza de ballet interpretada por una alumna de la escuela, asina como d'una xota vaqueira interpretada por un alumnu del centru acompañáu de so padre. Zarró l'actu la Banda de Gaites Ciudá d'Uviéu, qu'interpretó dellos temes, rematando col "Asturies, patria querida", que corió tola xente.

El teatru, pensáu pal alumnáu d'Educación Primaria y Secundaria, tamién tuvo presente nesta 40 edición de la Selmana de les Lletres. Nel Teatru El Llar de Corvera representóse, el martes 30 d'abril, "Hansel y Gretel", de "Higiénico Papel", la obra ganadora del II Premiu Nel Amaro de teatru profesional en llingua asturiana y gallego-asturianu. Los díes 8 y 9 de mayu, nel Teatru Llaboral Ciudá de la Cultura de Xixón, representáronse los espectáculos "De qué color ye'l sol", de "Kamante Teatro", y "Nunca nun se sabe", de "Higiénico Papel", dirixíos al alumnáu de Primaria y Secundaria, respectivamente.

Un añu más la comunidá educativa participó na celebración de les Lletres Asturianes nes sos manifestaciones lliteraries y musicales, amosando la vitalidá y el grau tan altu de normalidá de la llingua asturiana nos centros escolares del Principau.

Compartir en Twitter
Compartir en Facebook