Hipnotismu de les máquines

Venti años tuve a poner clas como maestru na Escuela Pública enantes de tener el derrame celebral. Garróme nuna dómina de cambéu: empecé cuando los móviles namái servíen pa llamar y a la reciella nun-yos atraíen muncho; acabé hai diecinueve años cuando si nun teníes un móvil yeras un fatu. L’atraición a estos dispositivos llegó a ser una adición asemeyada a la droga. La escuela dexó de ser un llugar pa socializar onde la neñada deprendía a convivir colos de la so edá, tresformóse nuna cueva onde xugar col móvil.

Tuve destinos de zona rural onde munches/os alumnes/os vivíen ensin otros collacios de la so edá en pueblu. Organizábemos salíes n’autocar pa que convivieren: nin cantaben cancios d’excursión, nin facien xuegos, toos diben enganchaos a los móviles y nun participaben en nada. Hubo de prohibíos l’usu del móvil nes excursiones, recoyíemoslos nuna caxa a la salida y nun-yoslos tornábemos hasta la vuelta. Dalgunos llegaben a facer trampes, diben con dos móviles y xugaben a escondíes. Al atrapalos na engañifa, retirábase-yos los dos móviles por un tiempu con abondes protestes. Tristayu a fartar.

Estos dispositivos tienen consecuencies emocionales graves y esfarrapen dafechu les rellaciones personales, promueven l’aisllamientu y, lo peor de too, nun traen la felicidá, son un sucedaniu de l’allegría que los atonta. Nun tamos a falar de babayaes, los padres y madres tendríen de ser más conscientes del dañu que-yos producen a los fíes/os, nun se traten de guarderíes dixitales sinón de máquines dañines pal celebru de la rapazada.

Anguaño hai abusos abondos colos móviles por parte d’una rapazada p’hacia otra, algamando a dase casos de suicidios pol escesu que s’exerce ente los poderosos del colexu y los prubitinos. Nun sé onde vamos parar, glayemos que yá valió, tomemos en serio la gravedá de la que tamos a falar.

Suscríbete para seguir leyendo