Siento un gurrión pipiar. Zarro los güeyos, dexo que la melodía m’acariñe los tímpanos y noto como la mente se me relaxa dientro d’un vuelu fechu de silenciu. El ruxir d’un coche estrózame la calma llograo. Maldita ciudá, atarraquitada de xente qu’adora’l ruíu como dios que-y soluciona’l mieu a esi vacíu de pallabres qu’asela l’alma, a esi sentimientu marmurador qu’inunda los pensamientos perdíos.
Silenciu, esa asignatura que munchos tienen suspenso y que nun son a aprobar nin copiando. Si supieren que ye una fonte de sabiduría, un alcuentru consigo mesmos que-yos amosa’l camín a conocese de verdá, a alloñase d’una frivolidá dañino que vacía les neurones de realidá, quiciábes-y dedicaríen una hora al día a estudialo.
El gurrión pósase al par de mio, dando esos blinquinos de la qu’otra vez me vuelve pipiar. Saco pan de la bolsa la compra, écho-y unes miguines y contemplo l’espectáculu que la vida mos regala ensin cobrar por ello. El silenciu xúntanos a los dos, intercambiando sabiduría mutuo. Un voceres ríñeme, diz que toi emporcando’l llugar dándo-y de comer a los bichos, como si nun fuere él más bichu que los animales. El gurrión cómelo too, la fame, y yo enséño-y al voceres el parque Begoña tou enllenu de la basura que los humanos dexamos tirao en suelu. Ruíu de pallabres mal sonantes d’un egoísta que-y molesta’l dame tira de la vida.
Silenciu, respetando unes normes mínimes onde tou nun val, onde esi ye que yo soi asina y nun voi cambiar quede afogáu polos drechos que tienen tolos demás. Saber preguntase si lo que faes nun molestará, ser a afondar nel pensamientu críticu p’hacia ún mesmu.
Si ficiéremos eso, los vienres o sábados peles nueches aforraríemonos d’esos glayíos, d’esos cantares desafinaos, d’eses reñes que ruempen el sueñu los demás.
El silenciu, n’ocasiones, llograría que toos supiéremos convivir.
El sábadu 17, a les 12 del meudía, taré firmando llibros na “Selmana Negra” na caseta de la editorial Trabe.
