El 6 de mayu, primer vienres del mes, celébrase’l Dia de les Lletres Asturianes. Y cuando una llingua ta de fiesta, alcuéntrense de fiesta toes. Los idiomes son como los raigaños d’un árbol, que se xunten nel tueru y formen la cadarma de la humanidá, la sencia de la intelixencia, si nun fuere poles llingües entá taríemos colgaos de los árboles.
Quiero a toles llingües, respétoles y amúrniome si dalguna desapaez. Eso ye lo que me diferencia de los otros seres vivos, pa bien o pa mal, el saber reconocer la importancia de los sistemes humanos de comunicación, de les llingües. Sicasí, hai persones que nun respeten los idiomes si nun son el suyu, qu’intenten imponer a otros pueblos la so forma comunicase, ríense de cómo falen y considérenlos inferiores. Eso ye racismu, puru racismu, imperialismu llingüísticu, y el pueblu asturianu súfrelo dende hai muncho.
N’Asturies, y per ende en Xixón, incúmplese la constitución a sabiendes de los gobiernos central y autonómicu, ensin dengún tipu de desplicación, con tol despreciu pal pueblu astur. Siguin a marxinalu, col envís de que desapaeza l’asturianu, de que muerra ya imponer, y eso sí que ye imponer, el castellán. Suena triste, pero real.
Quiero a toles llingües, al castellán tamién, los idiomes nun s’odien ente ellos, son dalgunos seres humanos los qu’odien, los que faen les guerres, los qu’estrocen otres formes de comunicación distintes a les suyes. Pero nun saben que cada llingua que desapaez, desapaez un cachín de la cultura universal y el mundiu ye más probe.
El pueblu asturianu tien otra cita’l 7 de mayu na Estación del Norte d’Uviéu, a les 12 hores, pa reclamar lo que ye de so, la oficialidá del asturianu y el gallego-asturiano. Amosemos que los árboles tán pa dar osíxenu a la Tierra y non pa colgase d’ellos.
