Suscríbete

La Nueva España

Contenido exclusivo para suscriptores digitales

Nel Morán

El viaxe cercanu

Una aventura con otros amigos en Llanes, sin falta dir a Nueva York, Londres ni París

Nun soi a remembrar la edá esauta que tenía, albidro que me movía ente los diecisiete o dieciocho años, apencé con otros amigos una aventura en forma de viaxe a Llanes que nin en La Islla’l Tesoru esfruté tanto. Deseguida coneutamos con otros campistes mozos y entremos nun suañu de difícil escaezu, nun branu carnal nel que día a día nos sorprendíen los segundos, los llugares que pensábemos máxicos. Nun nos fizo falta dir a Nueva York, Londres, París… ehí al llau esperábanos una llibertá ensin estatues, un palaciu ensin reyes que nos cobraren hasta por respirar, torres nes que nun había de xubir pa ser felices…

Nel mesmu Xixón, hai llugares que casi tol mundiu conoz y que munchos enxamás nun tuvimos. Sitios ablayantes, onde conquistes la tranquilidá, el relaxu, la paz… Porque´l viaxe nun ye cuestión de distancia sinón de maraviyar l’espíritu. La primer vez que m’averé a la islla La Tortuga na Providencia, sentéme na yerba d’enfrente y quedé hipnotizáu pola mar y aquel piacín de tierra maravioso. O cuando xubí Deva p’arriba y atopéme naquelles llanures altes que m’asosegaben la mente. Ya infinitos rinconinos d’esti conceyu que tan a esperar a que nun seyamos tan provincianos y los descubramos; qu’entamemos a valorar lo nueso que tien igual o más valir que lo de fuera,

Pesllámonos, ensin querelo, nunes costumes consumistes que nos lleven a llagos llonxanos y munches veces nun tuvimos nos ablucantes llagos de Somiedo; a picos suizos cuando tovía nun xubimos a ver l’Urriellu; a playes de munchu ringurrangu cuando nun pisamos Gulpiyuri,… Cuidamos qu’hai de colar llonxe pa ver dalgo espampanante, cuando equí n’Asturies, d’oriente a oucidente, atopamos sitios que paga la pena conocer.

Y como escritor, aconséyovos tamién viaxar pela lliteratutra, llevaravos a escenarios inimaxinables; y si ye n’asturianu, meyor que meyor.

Compartir el artículo

stats