Suscríbete

La Nueva España

Contenido exclusivo para suscriptores digitales

Nel Morán

Asturies, tierra d’agua

Lo siguiente en privatizar sedrá l’aire

Asturies yera tierra d’agua, coles estaciones bien afitaes y el sentimiento astur bien fondo. Dir nel branu a San Lliorenzu colos collacios, nós teníemos vezu de parar na escalera 9, y topase con un bastiazu que moyaba hasta los sentimientos yera normal. Sicasí, nun nos amedranaba, baxábemos igual a l’arena, poníemonos en traxebañu y atapábemos la ropa coles toballes. Güei enfurruñaríemonos, echaríemos dalgún cagamentu qu’otru como xente malcriao y escaeceríemos qu’esti cambiu climáticu ta a dexanos ensin agua dulce dalo.

Lo peor alcuéntrase en que nun nos decatamos que personal más aviespáu allégrase, ve un negociu nello, van arrampuñanos l’agua y ponela nes manes de los lladrones de siempre. Otru bien común, serviciu primordial, qu’entama a perder la coleutividá pal bien de les utres privaes, qu’enriquecen a dos a costa de millones de seres humanos. Hai tiempu que la sociedá tomó esta deriva, baxo la xabaz globalización, cola mentira repetida una y otra vez hasta casi facela verdá, diciendo que lo privao xestiona meyor que lo público. Lo privao xestiona bien pa dar ganancies a los capitalistes y emprobecer al pueblu, al que sólo lo público-y garantiza xusticia ya igualdá. Y sinón miremos pa la lletricidá, de la que nos prometíen una meyora pal consumidor, un aforru gracies a les empreses privaes y el so eficiente trabayu, que les empreses públiques arruinábennos. Depués d’abondo tiempo, los precios subieron a llendes ablucantes, hai xente del pueblu que nun pue nin pagase la factura y la otra namái mal págalo; por embargu, los xestores privaos de la lletricidá enanchen y enanchen les sos ganancies.

O paramos esta llocura, o vamos a la probitú de la mayoría pa que unos pocos vivan a la bartola. Quédanos poco pa ello, nun nos dexemos engañar polos sos turuteros. Lo siguiente en privatizar sedrá l’aire. Tiempu al tiempu.

Compartir el artículo

stats