Remembrances d’aquellos branos en La Cuesta’l Cholu, sentáu colos collacios, mirando al sol fuxir pela mar demientres dexábemos nes manes de los mayores arrexuntar l’alimentu del iviernu. La ciudá acoyía de los pueblos del conceyu tola collecha qu’almacenaben en horros y paneres. Y yera na seronda cuando apilaben pali que pali tolos manxares ivernales. El futuru de Xixón alcontrábase nes quintanes de la rodiada.
¿Ónde ta agora’l futuru de Xixón? Nun filu a piques frayase. Nuna esperanza perdida na ganancia d’unos pocos, del egoísmu. El futuru Xixón ye’l mesmu que’l de la Tierra, la destrución del planeta baxo los intereses de los ricos; la destrución del pueblu astur pol desinterés de la clas alta, que coló pa Madrid con tolo qu’arrampuñó del so pequeñu país. De nun páralo too darréu, esgónciase lo poco que queda en pie.
Y qué tamos a facer. Nada. Cuidamos que la globalización nun hai quien la pare, ye inxusta pero demientres nun nos mate a nós, nun glayamos, nun mos desangramos. La mentira tornóse en verdá y les cloaques gobiernen ensin ser escoyíes por naide, por esa gracia divina de dixímoslo nós y vós a callar, conformáivos con votar a los que tienen obligación de doblase ante les nueses órdenes.
Y el planeta ve como lo tamos a matar. Estrozamos les mares, les tierres, l’aire, la vida… Pensámonos los reis de la naturaleza y tamos a acabar con ella, camentando que tamos penriba d’ella, qu’un milagru divín salvarános a última hora. Hasta que la Tierra quede erma como Marte, o Venus, o Saturnu… Eso sí, más gocha que toos ellos xuntos.
La riqueza del planeta ta nél mesmu, nes sos plantes maravioses, nesos árboles que tenten rexenerar l’aire qu’esfarrapamos, nesos animales que nos aguanten más de la cuenta y nesos minerales nos que se llanta la natura. Sobramos nós y nun mos decatamos d’ello.
