Allampiáu anguleru

Les más de les veces tenemos na tierra costumes abondoses que nun faen necesariu importar foriates

Nel Morán

Nel Morán

Allampiáu Anguleru, sé que vienes la nueche del 24 al 25 y que voi un migayín pilláu, soi una llaceria col tiempu, téngolo de reconocer. Namái soi puntual nos mios paseos pel muelle o La Lloca, pero eso nun ye raro nun llugar tan afayadizu como Xixón. Como nun te voi pidir regalos sinón deseos, cuido que nun vas tener problemes en cumplímelos fuera hora. Y paso a dicítelos, qu’enrróllome como los bigarinos.

De mano, lo de tolos años, a los de Xixón préstanos gastar el cuentu colos de fuera, y si yes de casa nin agua. Pidi-yos a los responsables del conceyu qu’entamen actos oficiales contigo, col nuesu queríu Anguleru, pa eso yes un ser máxicu astur.

Puxar porque s’alite la costume los aguilanderos, yo de neñu salía pel pueblu a pidir l’aguinaldo y nun sabía un res del cafiante trucu o tratu yanqui. Les más de les veces tenemos na tierra costumes abondoses que nun faen necesariu importar otres foriates. Alcuérdome que salíemos nestes fiestes y pel antroxu y pasávemoslo de mieu.

Falando d’antroxu, valió de chirigotes sureñes, n’Asturies tenemos personaxes propios como los guirrios qu’allegren les fiestes. ¿Y qué me dicíis de la Comedia? Salíen grupos de xente mazcaritaos de personaxes a esgaya y facíen representaciones enllenes de retranca nes que se criticaben fechos que pasaren durante l’añu, y tou na cai. Nun taría mal que nel Xovellanos se ficiere concursos de comedies.

¿Y del Día les Ánimes? Pela nueche entamábense picies ente la rapazada que gociaben a más nun poder. Tamién salía la Güestia, desfile de muertos, que recoyíen a tolos que se cruciaben pel camín, y soltaben aquello del vivíi de día que la nueche ye mía. Orniábense los llugares con calabaces y otros aperios afayadizos. Nun nos fae falta pa nada’l foriatu Hallowen.

Y paro, que voi cansáte, Anguleru. A ver si se cumple dalgún d’estos deseos

Suscríbete para seguir leyendo