Alcordances del pueblu d’Asturies

Llegué a Xixón a los siete años d’un pueblín industrial, Trubia, que taba arrodiáu d’una natura descomanada. La familia de mio madre venía d’esos paraísos, Perlín y El Picayu, colos que yo tuve una rellación especial: contaute cola tierra, colos árboles frutales, cola güerta, colos animales y con unos familiares de los que caltriaba amor.

Nun fo hasta que me llevaren a la Feria de Muestres y comimos tiraos na yerba nel Pueblu d’Asturies, como nes fiestes de la rodiada de Trubia, que sentí que l’amor de Xixón se caltriaba en min, facía sentime como en casa, na mio tierra, Asturies. Abrióse un canal d’amistá ente aquel llugar y la mio infancia, amistá qu’entá dura anguaño.

A los diecinueve años torné a esi sentimientu d’asturianía con aquel requexín de ciudá tan escaecíu poles diferentes alcaldíes. Luis Argüelles y El Presi convidaron a Conceyu Bable a vender los domingos, día nel que se celebraben alcuentros musicales de la tierra, y tuve la suerte de vivir el llugar fonderamente. Esfrute na tranquilidá más fonda la guapura del llugar, pasié caun los requexos.

Les Olimpiaes de Deporte Tradicional del Garrapiellu averáronme de nueves a casa. Fo otra forma velu al traviés de los abondosos deportes de la tierra, tan desdexaos pol gobiernu y la televisión d’Asturies. Aquel espectáculo pagaba la pena, gociéla como un verderón, lo de casa siempre lo meyor, pero siempre lo abandonao poles autoridaes.

Agora que vienen les eleiciones municipales nun taría de más que les diferentes opciones polítiques mos ficieren saber la so intención pa col Pueblu d’Asturies: agrandalo con más idees y terrenos, con una casa les llingües autótones d’Asturies, con unos domingos onde s’enllene d’actividá, de deporte asturianu, de música la tierra, de diversión tradicional pa los neños...

Y nun taría mal que la TPA viere’l llugar como un plató de televisión únicu.

Suscríbete para seguir leyendo