Más diálogu, menos internet

Son abondes les remembrances de mocedá, unes meyores y otres peores, que nun soi yo’l que diz que tolo d’enantes yera meyor, y menos la dictadura; considero que son abondoses les maravíes d’anguaño, qu’hai xente a esgaya faciendo un trabayu ablucante, los mozos y moces ente ellos. Sicasí, convién repasar aquellos tiempos, comparalos colos que nos toca vivir agora, ya intentar avanzar seguros de nun alloquecer a lo fato.

Nel añu 1981 xuntábemonos rapazada variao nun café de Begoña, L’Aurora, peles tardes. Mirábemonos a les cares, ensin pantalles de móviles que nos mazcaritaren, y opinábemos de temes a rabiar, aldericando llibremente, almitiendo les discrepancies. Sabíemos que nel mundiu había opiniones estremaes y que podíen coyer toes na Tierra. Nun sabíemos en que consistía esi artificiu de la opinión pública, pero refugábemos d’ella como una mentira al serviciu los de siempre.

Anguaño, cuántes charres cara a cara se celebren, cuántes discrepancies conviven xuntes, cuántos sentimientos se comparten ensin que seya al travies d’una pantallina que nos separta más que xunta. Dir pela cai y tropezase con móviles andantes que nun miren nin en que ciudá tán, que nun respuenden a lo qu’asocede na so contorna, que piensen que la realidá ye la irrealidá d’internet... Y asocede con tolos avances, tienen la parte positiva, pero l’abusu d’ellos acaben con una adicción desaxerata.

Les coses sábense primero. Les noticies vuelen. Pero qué parte de verdá hai nelles. Crucifícase a persones que nin conocemos porque nes redes hai dalguién manipulando intencionadamente, hai llevantos fechos de pura mentira, de pura maldá, y tu piques, participes. Piensa dos veces les coses enantes de meter en pozos fondos a inocentes. Porque yes tán culpable como’l que llanzó’l llevantu.

Considero a internet un avance ablayante, almito que ye una maravía, pero por desgracia somos nosotros, los humanos, los que lo degradamos.

Suscríbete para seguir leyendo