Opinión

Vida enllena de furacos

Siéntome al par "Les Chapones" a contemplar la mar y siempre acabo preguntándome si sedríen verdá tolos bonos deseyos d’estes fiestes. Cada fola, una cara conocida diciéndome milenta requilorios que se repiten vacíos de sentíu. Cada gavilueta, dineru y dineru marafundiáu en comides, regalos, lluces, festeyos y folixes. Cada pasiante, un silenciu dafechu al acabase tanta felicidá, muerren tolos voladores de ruíu ablayante.

¿Y agora qué?

Escaecimientu de tolo que prometíemos cambiar: el discapacitáu a siguir desdexáu; les persones que sufren enfermedaes raro pudriéndose día a día; los terminales morriendo nos hospitales abandonaos… Nin una migayina pa investigar en ciencia y pa la sanidá público que meyore la vida d’abondos ciudadanos.

La sociedá egoísta continúa a movese namái polos intereses de so, ensin mirar pal probe, pal distintu, pal que necesita d’atención pola edá… Tantes bones pallabres queden arrequexaes nesi par de selmanes, cuando ellos ordenen que toca, enxamás enantes o depués.

Y danme ganes de llorar, de berrar como un neñu al que-y dan una mocada, nin yo m’alcordé d’esos pueblos que tán en guerra, esa asesina que nun para nin nes fiestes. Una industria armamentística que reza por un nuevu llugar onde poder facese más rico y que celebra la navidá, el ramadán y tolo que faiga falta con tal d’enanchar los beneficios.

Una folona blincó penriba del paséu, espiértame del mal suañu nel que taba somorguiáu, un paisanín quedó fechu sopa y llevántome a siguir coxicando.

Sedrá tan difícil convivir en paz ya igualdá, ensin qu’unos se llevanten enriba los otros; queriéndonos y respetándonos ensin que faiga falta que seyan unes feches específiques. Sedría tan difícil que tolos díes del añu nos deseyáremos lo meyor pa la xornada que vamos vivir.

La vida son como "Les Chapones", ta enllena furacos que faen imposible que meyoremos como seres humanos.

Suscríbete para seguir leyendo

Tracking Pixel Contents