Concentraición desconcentrada

Préstanos ser felices, descansar, llograr que la esistencia nos seya afayadiza. Dalgo tenemos ganao, vivimos nuna ciudá con una calidá de vida abondo meyor que na mayoría peninsular. Xixón tien llugares abondo onde pasiar, la cultura suel ser mui valorada, la xente ye abierto y sociable…

Sicasí, en Xixón la mayoría los ciudadanos nun somos dafechu felices, dalgo nun furrula, tuércesenos no fundamental. Neto a otros llugares, pa que dellos privilexaos seyan a vivir a tou trapu, la mayoría de nós tenemos de producir desaxerao, hores y hores, munches veces mui penriba les cuarenta hores lexislaes, tiempu que nun se cobra anque se faiga.

El conceutu de productividá ta amañáu, nun s’avera a la realidá de trabayar pa vivir, na mayoría los casos vívese pa trabayar. Metiéronnos na chola que’l bon asalariáu ye’l primeru en llegar y l’últimu en salir, el que consigui absorver dafechu l’estrés ensin rechistar, el qu’almite toles xeres seyan o non seyan la so obligación… Pero eso nun se pue llamar productividá, namái ye mala organización por parte los direutivos la empresa.

Cuando se carga al productor de xeres ensin chapeta, mal organizaes polos xefes, métese-yos de tala miente un desaxuste nel celebru que tán tol tiempu produciendo a niveles mui baxos de capacidá. Nun rindin, nin siquier tando les venticuatro hores nel tayu.

El rindimientu desixe que les xeres vaigan d’una en una. Si son interrumpíes pola última ocurrencia del llistu de turnu, el trabayador tarda unos ventitres minutos en tornar a un altu rindimientu. Y si’l llistu de turnu tien el mal vezu d’interrumpir a los asalariaos cada dos por tres, la empresa puede llograr llamase Desastre S.A.

Y quieran o non, los trabayadores tienen de tar descansaos pa llograr lo meyor de so. Nun hai dulda dala que consiguirán meyores resultaos en treinta y cinco hores bien feches qu’en cuarenta apetiguñaes.

Suscríbete para seguir leyendo