La felicidá d’amar

Al llevantame o chucame pienso naquelles persones a les que quiero, ten o nun ten yá conmigo, y una felicidá descomanada enche’l mio alma. Ehí ta’l secretu de sentise realizáu: afáyase en desear bonos sentimientos pa los otros, non en llograr bienes materiales a mamplén pa ún mesmu. Cuido que l’egoismu pue considerase l’antónimu de la felicidá.

Amar una flor, un gurrión, una fola, una persona… Ser quien a entregase a los otros, da-yos lo meyor qu’ún ye a ello. Y piesllar los güeyos y respirar fondo, dexar que cada célula de nós se vacíe y los suaños les enllenen de realidá.

Una sociedá que quier meyorar nun lo fae col consumismu como únicu oxetivu. Nin puxando por ser meyor que les sociedaes vecines, por ganales y dominales. Fáelo repartiendo amor, un afeutu candial y ayenu a la posesión. La felicidá ta en compartir y non en ser el meyor.

Y esa sociedá sedrá imperfeuta si dexa atrás a la xente d’edá, somorguiándolos nuna soledá que los entristez. Merecen el nuesu respetu, la nuesa consideranza. Pensar que nun hai muncho foron ellos los que trabayaron por nós, demientres llevábemos los pañales físicos o mentales.

Tamién sedrá una sociedá xabaz si arrequexa y menosprecia a los discapacitaos. Naciérase con ello o adquiriérase a lo llargo la vida. Hai de facilitase la vida a esos tamién seres humanos. Un migayín d’amor ye lo que necesiten, non pena, non velos como prubitinos.

Asturies y Xixón tienen maravíes que nos faeríen ser felices a toos/es. Compartiendo. Nun dexando atrás a los otros. Repartiendo la vida, los alimentos, los conocimientos, tou. ¡Qué gran pallabra esa de compartir! Pero la pena ye que la tenemos olvidada, Domínanos l’egoismu, esi que nos quita l’alma.

En nosotros ta’l llograr tener la felicidá d’amar.

Suscríbete para seguir leyendo