Suscríbete

Contenido exclusivo para suscriptores digitales

Escolinos | El suplementu de la xente menudo

L’Asturianu: cuatro formes de ser optativa

L'asignatura en Primaria compite con Cultura Asturiana, en Secundaria con Francés o otru idioma, ente otres, y en Bachilleratu nun cuenta pa la preba d'accesu a la Universidá

Na semeya, un grupu d’escolinos na clas  d’Asturianu en L’Entregu . Lne

Na semeya, un grupu d’escolinos na clas d’Asturianu en L’Entregu . Lne

Les llingües autóctones d’Asturies, asturianu y gallego-asturiano, tán presentes nes cuatro estayes de la educación non universitaria: Infantil, Primaria, Secundaria y Bachilleratu. Sicasí, en cada etapa ye diferente y en toes, a escoyer ente otres materies, ye dicir, ye d’estudiu voluntariu. La enseñanza de les llingües propies entamó en 1984 y anguaño, tolos centros han d’ufiertales, respetando les fasteres d’usu de cada llingua. Eso sí, nun s’enseñen nos ciclos formativos de Formación Profesional nin tampoco na Formación Profesional Básica.

Sobro estes llínies, los cartelos de les campañes de matriculación d’Asturianu y Gallego-Asturiano. | F. G.

En Primaria, l’alumnáu puede escoyer ente Llingua Asturiana/ Gallego-Asturiano o Cultura Asturiana. “Pa ser maestru d’Asturianu tienes que tener estudios universitarios de Maxisteriu y la mención d’asturianu, como el maestru especializáu tienla n’inglés, música o francés”, desplica Vitor Suárez, docente en el colexu Parque Infantil d’Uviéu. “Hai una diferencia fundamental col restu, somos interinos y ensin especialidá reconocida”, diz. Esta asignatura ocupa una hora y media del horariu escolar de los neños. Esti sector del profesoráu tampoco puede anovar méritos para xubir na bolsa d’interinos nin fixar la so plaza, daqué que ye estensible a tol equipu docente de Llingua Asturiana.

L’Asturianu: cuatro formes de ser optativa

N’Infantil, la ufierta nun ye obligatoria y ta venceyada a la matrícula de Primaria, si ye alta. “Pocos centros solicítenla”, apunta Suárez. Sedría una hora complementaria dientro del apartáu de Llinguaxe y Comunicación.

Les cifres de matriculación en Asturianu ronden el 50 por ciento del alumnáu. En Secundaria y Bachilleratu rexístrense menos estudiantes. Desplícalo Inaciu Galán, profesor d’Asturianu nel IES Fernández Vallín: “Puedes escoyer ente Asturianu, Francés u otros idiomes y otres materies como Teatru, Fotografía,...”. La asignatura ocupa dos hores nel horariu de los tres primeros cursos de ESO y tres, en 4º. En Bachilleratu, pasó nos caberos años de tener cuatro hores selmanales a una. “En Bachilleratu nun cuenta pa la PAU y entós, la matrícula ye baxa”, sorraya Galán, qu’esclaria que nun esiste un cupu mínimu pa recibir clas d’asturianu magar que la asignatura seya escoyida por un alumnu solu, “tien protección estatutaria y llegal”.

Con estes blimes, l’asturianu ta presente na escuela y eso ye posible porque así lu establez el ártículo 4 del Estatutu d’autonomía de 1981y tamién n’aplicación de la llei d’usu y promoción del bable/asturianu de 1998. Con eses bases xurídiques, l’asturianu y el gallego-asturiano son llingües que, nun siendo cooficiales, gocien de protección.

Los docentes d’Asturianu yá aportaron a los colexos ya institutos, d’oriente a occidente, rurales y urbanos. Dellos repiten centru, otros non y otros aún tán a la espera de prósimes convocatories.

Sicasí, el equipu docente amosa’l so esmolecimientu pa con les llingües propies d’Asturies, pola pervivencia del idioma y col enfotu d’algamar que los escolinos caltengan una de les peculiaridaes evolutives del llatín. Conscientes de la so interinidá, de que nun esisten oposiciones p’afitar les places pola ausencia d’una regulación llegal del idioma, amen la so profesión y la so llingua.

Compartir el artículo

stats