Viaxar y conocer mundu como fixo’l famosu personaxe de dibuxos animaos Willy Fog. Ye la propuesta del Colexu Rural Agrupáu (CRA) Pintor Álvaro Delgado de Valdés pa los alumnos d’Infantil del presente cursu. El centru trabaya por proyectos y esti primer trimestre del cursu, casi recuperando una actividá llendada pola pandemia, van conocer otres cultures y llugares del mundu.
La encargada del proyectu, la profesora Eva Blanco, esplica que la primer parada, en Londres, foi un ésitu. “A los alumnos-yos encanta”, diz. “Vamos conociendo qué los motiva y convidámoslos a preguntar”, añede. El mesmu descubrimientu ya interés fain posible otru aprendizaxe. Al traviés de la temática en sí, trabayen tamién la lóxica, la matemática o la llectoescritura, cumpliendo en tou momentu cola propuesta educativa del currículu del ciclu. “Tou nún”, indica la profesora, bien arguyosa de l’atención ya interés que ponen tolos estudiantes.
El proyectu nun ye dalgo zarrao, de xeitu talu que se resuelven toles duldes de los estudiantes y, en casu de qu’esista munchu interés por daqué, “lo que contábemos facer va camudando”. Los tutores presenten la ciudá y tamién la so cultura y los sos monumentos, ente otros conceutos. “Nel casu de Londres, la nuesa primer parada, preguntaron muncho qué comíen, por casu, o cómo se vistíen; y llamó-yos l’atención enforma la Guardia del Palaciu la Reina”, destaca Blanco. “Afayen como si de verdá viaxaren, porque lo viven”, indica.
El CRA de Valdés tien cuatro escueles actives: en Cadavéu, Barcia, Outur y Muanes. En total, tán arreyaos a esti proyectu viaxeru trenta alumnos d’edaes que van de los 3 a los 5 años. Cada selmana, los alumnos visiten un país. La idea de los profesores ye qu’a lo llargo del trimestre faigan parada en tolos continentes. Van poder conocer Hong Kong, Exiptu y la India, sobre los que yá tienen preparáu material.
Gracies a esti proyectu viaxeru inspiráu en Willy Fog y, de la mesma, na novela de Xulio Verne “La vuelta al mundu n’ochenta díes”, nes clases tamién falen sobre los medios de tresporte qu’hai nel planeta y que s’usen p’aportar a llugares poco afayadizos. “Gústa-yos l’avión”, señala Blanco. Otru asuntu nel qu’avecen aparar muncho ye nos animales orixinarios de cada país.
