Superpoderes

Daniel atopóse de sópitu nuna caleya ensin salida. Taba escapando de los abusones de clase, Ferrán y Macías, dos años mayores qu’él, y ensin saber por qué púnxose a siguir un trébole de cuatro fueyes. Esnalaba al aldu del aire fríu d’chobre y avanzaba pela cera a saltinos o esllizándose ente adultos, cubos de basura, fueyes de periódicu y baldoses llevantaes del suelu. Non, nun vivía nun barriu de bayura y perres, pero yera feliz. Corrió detrás del trébole y degoló la esquina de la carnicería de Paco. ¿Pa qué s’esviaba ensin necesidá? Recto llegaba a casa... Y entós vió la muria, de trabes y lladriyu. Una caleya zarrada, un furacu, una trampa. Cásique escuchó los pasos arrítmicos de les carreres de los perseguidores, Ferrán y Macías, los abusones oficiales.

El trébole crució al otru llau de la tapia. ¿Cómo? Como si desapaeciera en pequeños bits d’información. Daniel nun podía creyelo. ¿Ónde colara’l trébole? ¿Qué misteriu había naquella caleya y naquella muria? Daniel avanzó y tocó’l lladriyu. La mano entamó a dilise en cuadrinos cibernéticos. Detrás d’él un glayíu de Ferrán avisólu de que taba acabáu. ¡Diben descubrilu de xuru! Y diben machucalu. Eso tamién yera seguro. Solo por tropezar con Macías na entrada de la escuela. Bono, en realidá, el delitu de Daniel yera estudiar bien. Prestába-y deprender y saber muncho de munches coses. Facía los deberes a tou meter y lleía a esgaya. Y agora la so curtia vida diba terminar nuna caleya misteriosa. Nun podía ser, pensó. Asina qu’entró na muria d’un saltu, trespasóla, y al otru llau aprució un campu de tréboles de cuatro fueyes y una tortuga con gafes.

–¿Tu quién yes? –entrugó la tortuga.

–Yo, Daniel –dixo, impresionáu d’una tortuga que falaba.

–¿El nuevu? –y apuntó dalgo nuna llibreta de tapes bermeyes–. Val, pues pasar.

–¿Pero a ónde? ¿Por qué?

–¿Tu nun tienes superpoderes?

–¿Yo? –preguntó ablucáu dafechu Daniel–. ¡Qué va! Nin tengo superfuercia, nin vuelo, nin llanzo rellampos, nin soi invisible, nin nada de nada...

–¿Nun yes intelixente y aplicáu?

–Sí, ¿y qué? ¿Pa qué sirve eso?

La tortuga sorrió con un biecu guapu de cariñu.

–Pasa, anda, pasa –dixo la tortuga–. A esti mundu solo entren nenos con superpoderes.

Suscríbete para seguir leyendo