La solidaridá trespasa fronteres y nun entiende d’edaes. Los escolares del colexu Santo Domingo d’Uviéu (FESD) participen nuna iniciativa d’ámbitu nacional y entamada por Cáritas Diocesana Tenerife p’ayudar a los afectaos pola erupción del volcán Cumbre Vieja. Un proyectu col que’l centru uvieín y los sos 25 colexos hermanos repartíos per toa España albidren recaudar alredor de 100.000 euros p’ayudar a los afectaos pol volcán.

P’algamar esti oxetivu, alumnos y profesores del Santo Domingo tán vendiendo unes pulseres solidaries. Tol dineru que se recaude con esta iniciativa va destinase íntegro a la Cáritas tinerfeña, qu’opera na diócesis a la que pertenez la isla de La Palma. “Ye una pequena forma de collaborar colos nuesos vecinos canarios y apurrir, con esti pequenu xestu, una gran fola de solidaridá pa los que más lo necesiten”.

Alumnos de Primaria del Santo Domingo faen la figura d’un corazón. | C. S. D.

Pero’l xestu de los escolares asturianos nun quedó nesta campaña. El pasáu día 3, coincidiendo cola fiesta del dominicu San Martín de Porres (patronu de la Xusticia Social), los neños del Santo Domingo participaron nel actu simbólicu “FESD con La Palma”. L’oxetivu yera amosar la solidaridá de profesores y alumnos colos afectaos pola erupción del volcán, y pa facelo los escolares axuntáronse en corros, nun actu que se desenvolvió d’un xeitu simultaneu mesmo nel colexu uvieín como nos sos 25 centros hermanos.

Les pulseres del colexu.

Asina, y mientres la so xornada escolar, los distintos grupos del colexu uvieín xunieron les sos manes faciendo círculos, corazones y la figura de la isla de La Palma p’amosar asina tou’l so encontu a los afectaos pola erupción del volcán. “Somos conscientes de que munches families perdieron la so casa, los sos preseos, les sos alcordances ya inclusive el so espaciu de trabayu o’l so mediu de vida, polo qu’apura la solidaridá de toos colos que más necesiten agora la nuesa ayuda”, afirmen dende’l centru, dende’l que tamién afalen a realizar donaciones a Cáritas Diocesana de Tenerife, yá sía por aciu de tresferencies a la so cuenta bancaria (ES0221006722612200733169) o cola app Bizum (códigu de sistema: 03762).