“Fuistis unes valientes y merecíeis tener ésitu. Esta ye la escuelina que yo suañara con dirixir. Nun pudo ser, pero allégrome muncho de qu’esi suañu vuesu y míu sía esta realidá”. Mari Cruz Collado, exdirectora de la Escuela Infantil d’El Bibio y un referente mientres décades de la Educación Infantil en Xixón, punxo’l sábadu palabres a la norabona que munchos-y queríen dar al proyectu educativu “Andolina”. Un programa que cumplió diez años y que lo celebró con una fiesta a tonu cola xesta que foi entamar y afitar el colexu nel mapa educativu asturianu.
“Andolina” ye la hestoria d’un suañu. El que compartieron delles madres que concidieron va tiempu en grupos de lactancia y de crianza. Asina como dixo Eva Friera, la primer presidenta de la cooperativa “Andolina”, quién sabe si fueron les hormones del embaranzu y el sangre nuevo qu’aporta la natalidá los que nun-yos dexaron ver como daqué imposible’l so suañu de crear una escuela distinta pa los sos fíos. Angüaño nun saben esplicar perbién cómo lo fixeron, “nin por qué nun ablayaron colos primeros contratiempos –qu’hubo munchos y bien duros–”. Pero’l casu ye que suañaron en grande y apenes tuvieron qu’arrenunciar a nada de lo que planiaron.
Yá salieron los primeros alumnos que completaron infantil y primaria y entamaron la ESO ensin grandes traumas
En “Andolina” defínense como “un grupu de families que, tres camientu fondu sobre’l sistema educativu y la sociedá actual, propunximos apostar por un conceutu nuevu d’escuela”. Queríen una escuela qu’encontara nel aprendizaxe nel xuegu, que fuxera de los encorsetamientos tradicionales, que respetara los tiempos de maduración de cada neñu, que los fixera comprometíos, solidarios y felices; sobremanera, felices.
Y como nada de lo que víen s’afayaba a lo que buscaben, punxéronse manes a la obra a diseñalo. Y, asina, entamaron un colexu d’Educación Infantil y Primaria priváu, mistu y laicu, xestionáu como una cooperativa de families, ensin ánimu d’arriquecimientu y homologáu pola Conseyería d’Educación del Principáu. Na actualidá tienen más de 70 alumnos y una cuota mensual que ronda los 300 euros, cola obligación de que les families formen parte de la cooperativa –el primer añu puede ser de toma de contactu, ensin pertenencia a la cooperativaa.
Del centru yá salieron los primeros alumnos que fixeron el ciclu completu d’Infantil y Primaria en “Andolina”. Y entamaron la Secundaria ensin grandes traumas, dicen les sos madres. “Tamos seguros de que va haber de too. Al que-y vaiga perbién y al que-y vaiga menos bien”, “pero lo que tienen vivío y aprendío en “Andolina” nun-yos lo va quitar nunca naide”, cuenten unes d’eses madres pioneres, María Jesús Álvarez y Nuria Carvajal.
La xornada de celebración sirvió pa recordar toa esa hestoria niciera de “Andolina” y pa felicitase mutuamente polo llograo. Tamién p’agradecer a delles persones la so aportación enantes o mientres el desenvolvimientu del proyectu. Y ende entraron los abrazos pa Mari Cruz Collado, pa los y les líderes de la Cooperativa nos sos primeros años, pa dalgunos de los padres más implicaos o los docentes que lleven años aguiyando a los neños. Tamién hubo un agradecimientu a LA NUEVA ESPAÑA, pola primer portada periodística que se ganó’l proyectu, allá pel añu 2010. Una portada na que s’anunciaba qu’un grupu de madres entamaba un colexu distintu. “Foi un emburrión mui importante. Al otru día enllenósenos el buzón del email de persones que s’interesaben pol proyectu”, rellató Eva Friera. Dende entós hasta agora, el suañu sigue p’alantre.
