Unos 200 colexos ya institutos de tou’l Principáu yá se preparen pa recibir a L’Anguleru, el Papá Noel asturianu. Los pequeños –al traviés de los sos respectivos centros educativos– yá se punxeron en contactu con Santa astur mientres les últimes selmanes pa conta-y que yá tán preparando les actividaes rellacionaes cola so arribada y estancia na rexón. Dende Ribadeva a Ibias, pasando per Gozón, Uviéu, Xixón, Avilés, les cuenques o Picos d’Europa, toos rematen los preparativos pa celebrar la presencia de L’Anguleru mientres tol mes d’avientu n’Asturies.
L’Anguleru salió esti domingu 28 de payares del Mar de los Sargazos n’América p’aportar a Asturies el vienres 3 d’avientu. Esta salida retrasmitióse en directu y viose nel Acuariu de Xixón el domingu pasáu a les 12.30 hores. Hasta’l 24 d’avientu’l Papá Noel asturianu va tener decenes d’actividaes pol Principáu. La so primer parada va facela en Siero –el 4 d’avientu, a les 12.00 hores en Parque Principáu– pa recibir a los más pequeños.
Darréu va siguir esti itinerariu: L’Anguleru va tar en L.lena’l sábadu 11 d’avientu, na plaza d’Alfonso X el Sabiu; va siguir p’hacia Mieres, el domingu 19 d’avientu na plaza del Conceyu; va asomar per Avilés el xueves 23 d’avientu, na plaza’l Conceyu; darréu va aterrizar en Xixón, el vienres 24 d’avientu nel acuariu; y va poner el ramu a la so estancia en L’Arena’l mesmu’l vienres 24 d’avientu, nel puertu deportivu.
A lo llargo d’avientu dirán cerrándose nueves feches de recepciones oficiales de L’Anguleru pa que los más pequeños puedan falar con él en persona y apurri-y les sos cartes de Navidá. Amás, van entamase concursos de pintura y microrrelatos nos que van poder participar tolos centros escolares d’Asturies.
L’Asociación Cultural Garabuxada lleva 13 años xestionando la figura d’esti candial personaxe asturianu navidiegu, que cada añu tien más adeptos. L’Anguleru –amás de traer regalos el día de Nuechebona– promueve otros valores ente los neños y mayores: la protección y cuidáu del mediu ambiente; l’apreciu pol mediu rural, mesmo na mariña como nel interior y nel monte, y la recuperación de tradiciones asturianes venceyaes a la Navidá como son el Nataliegu –el tueru de la prosperidá pa les cases– y el ramu Nadal –l’árbol de Navidá n’Asturies–.
La Santa astur yá emprendió camín escontra’l Principáu esta fin de selmana a remolque de la maxa de la Navidá asturiana.
