La nueva guía pa l’arquitectura de los colexos catalanes –ellaborada pola Conseyería d’Educación de la Generalitat– cuenta con que se puedan facer dellos cambeos nel diseñu de los centros educativos pa tornalos más afayadizos pal alumnáu en xeneral y tamién más amañosos pa la integración de los neños nel momentu del xuegu nel recréu. Ente otros cambeos, permite la posibilidá de que desapaezan les pistes de fútbol de los centros educativos, col envís de favorecer la igualdá ente los más pequeños. En viendo estes nueves posibilidaes, convién facer rescamplar que’l colexu públicu de Sabugo, n’Avilés, yá entamó primero de la pandemia una redistribución del so patiu coles mires de “ameyorar la convivencia, amenorgando los riesgos y conflictos que surden nos recreos”.
El proyectu del nuevu patiu, que volverá siguir les mesmes pautes una vegada termine la pandemia, surdió pa dar solución al gran númberu d’alumnos que s’axuntaben nun espaciu pequeñu. “Les posibilidaes de xuegu quedaben llindaes prácticamente a escorrese unos a otros”, recueye’l proyectu pa desallugar el patiu del CP Sabugo. En viendo esta problemática, la solución del centru consistió n’ufiertar a tol alumnáu opciones de xuegu nel recréu, albidrando por dar respuesta a la diversidá d’intereses lúdicos de tolos alumnos y a les llimitaciones que s’atopaba caún d’ellos.
“Cuando yo allegué al centru taben prohibíos los xuegos con pelota por mor del espaciu acutáu”, recuerda l’actual secretariu del CP Sabugo, Javier Miranda. Énte esta norma, según esplica, “buscáronse otres alternatives, siempre cola inclusión como oxetivu en toles actividaes”. El patiu estremose en dos zones: la d’Infantil y la de Primaria. En dambes se dibuxaron dellos xuegos, dende inmuebles completos onde xugar hasta una piscina, cascayos o un campu de chapes.
Los xuegos armáronse nun calendariu de planificación selmanal en función de les preferencies del alumnáu. D’esti xeitu, el patiu de Primaria quedó estremáu en trés zones: una con bancos pa xuegos de mesa como cromos, axedrez o rompecabeces, ente otros; una segunda dedicada al xuegu llibre, y la postrera pa los xuegos apuntaos nel calendariu, con un máximu de dos al tiempu. Esos xuegos son variaos, diendo del típicu esconderite inglés o’l pañuelu hasta les chapes, los bolos o la comba, ente otros.
D’otru llau, el profesoráu –amás de xixilar les respectives zones del patiu– valora aspeutos como’l númberu de neños y neñes que participen en cada xuegu, si son siempres los mesmos o esiste variedá, les opiniones del alumnáu y el nivel d’ésitu o fracasu de cada xuegu propuestu. D’esta forma, les actividaes marcaes selmanalmente nel calendariu –que volverá entamase una y bones termine la pandemia– son dinámiques, mirando por que tolos alumnos se sientan a comuña ya integraos mientres la hora del recréu.
