Sema y collecha sostenible en Grau

Los escolinos del colexu Bernardo Gurdiel de Grau tán esmolecíos pol desarollu sostenible y ponen enfotu nes actividaes que tienen como oxetivu algamar un mundu meyor pa les xeneraciones futures. La concencia ecolóxica exposiga nel güertu, onde los escolines desendolquen la so creatividá por aciu la esperiencia manipulativa y el trabayu n’equipu. “Ye un recursu educativu empobináu a la formación de persones más sanes, en tolos aspeutos, y polo tanto a una sociedá meyor ye dicir a educar dende una perspectiva medioambiental”, desplicó Rosa González, mayestra de llingua asturiana del colexu moscón que ye amás la coordinadora d’esti proyeutu xunto a los escolinos de Sestu magar que too’l centru ta implicáu nes xeres propies del güertu ecolóxicu.

Dende ochobre a xunu, los escolinos ponen la so enerxía, el trabayu y la motivación na xera. “La tierra devuélvenos tanto o más”, añedió González. Semen y collechen y demientres ven como bilten y medren los ayos, llechugues, acelgues, maíz, berces y pataques, ente otres. Enantes, el llabor nun ye cenciello. los escolinos faen planos a escala del güertu pa semar o tresplantar cultivos, sigún el calendariu, construin bancales nuevos, echen abonu ecolóxico ya aireen la tierra pa tresplantar cultuvos de cada temporada. Llimpien, caven, poden y rieguen y tamién hai tiempu pa ellaborar purines recoyíos de los praos qu’arrodien al güertu.

Toles estayes del centru tan volcaes nel güertu. De fechu, los escolinos rellenen la compostadora colos restos orgánicos que separten na cocina del colexu recoyíos una vez per selmana, “pa la formación d’abonu ecolóxico propiu”, apuntó la mayestra de llingua asturiana. “Tamién los escolinos d’Educación infantil de 5 años lleven los restos orgánicos del so pinchín del recréu a la compostadora”, añedió.

Les xeres venceyaes al güertu nun son poques. Ye más, de xemes en cuando, los escolinos vienden parte de la collecha nun puestín y donen parte de las perres. Tamién da-yos por faer recetes saludables y trabayos d’investigación en dellos soportes sobre’l güertu.

Pa nun tener duldes sobre qué plantes toca plantar por cada estación. Los escolinos noten y lleven la cuenta de las xeres feches nun cuadernu de campu. Esta temporada amás de plantar brecol, coliflor y llombarda, entre otres, tamién faen llabores de conservación de plantes aromátiques del cursu anterior como’l perexil, oriéganu, romeru y tomillu llimoneru.

“Con too ello, deprendemos, esfrutamos y somos cada día más conscientes de que ta nes nuestres manes dir camudando les coses pa qu’esti mundu seya meyor y más sostenible pa tola xente”, finó la mayestra d’asturianu del Bernardo Gurdiel de Grau.